7Duen etew he uvag kun sepian sikandin, iyan, wazè din ketiǥeyunan. Ne zuen daan uvag kun pubri, iyan, dekelà is ketiǥeyunan din.
8Is sepian egkevelukasan din is untung din, iyan, wazà edhulgà te etew he egkeey-eyuwan.
9Is kerayag te menge metazeng ebpurung edsiǥa, iyan, is sulù te ebpemen-ulaula te mezaat ne egkeevukan mulà.
10Samuk dà is egketuvù pinaaǥi te kebpelavew. Ne is etew he metau, ebpesambag sikandin.
11Is selapì he melemu is paaǥi te kegkekuwaa zuen, meǥaan dà egkahanew, iyan, ed-uswag mulà is selapì he mereǥen is paaǥi te kegkekuwaa zuen.
12Is kenà kegkeengkena te etew te penganduy zin ne ebpekezezaat te ǥehinawa zin, piru is etew he naangken din is penganduy zin ne ebpekelig-en wey ebpekelipey kandin.
13Is etew he kenà ebpezumazuma te ibpenurù, iyan edsuǥù kandin he merasey, piru is etew he ebpezumazuma te suǥù, ebpekehendiyà mulà te keupiyaanan.
14Is ibpenurù te etew he uluwanen, iring te kedtudà te wahig he ebpekeveǥey te untung, su pinaaǥi zutun, egkesenggilahan ta is ebpekepemevavà te umur ta.
15Edtehuzen is etew he meupiya is ked-isip-isip din. Piru is etew he kenà edtuman te hustu, ne iring sikandin te ed-ikul ziyà te zalan he vetuwen.
16Is etew he metau he ed-isip-isip ke hendei is hustu etawa kenà, ed-is-isipen din dèpa, ne human din ebeeli heini, piru is lalung mulà kenè din en ed-is-isipen, umbe ibpeehè din iyan is kelelalung din.
17Is menunudtulà he kenà egkeseriǥan ebpekeveǥey te rirù, iyan, is menunudtulà he egkeseriǥan ebpekeveǥey mulà te kelinew.
18Is etew he kenà egkesuat he ebpenuruen, iyan egkepengkusan din is egkepeey-eyuwan wey egkepeel-elezan, iyan, egkezeliǥan mulà is etew he ebpekeventayan din is idawey kandin.
19Utew ta igkelipey emun egkekuwa ta is utew ta egkesuati, iyan, kenà mulà egkesuat he ed-iniyug te mezaat is menge tulebung.
20Is etew he uluwanen layun ebpekiduma te iring din he uluwanen, iyan, ebpekebmereǥen mulà is etew he layun ebpekiduma te tulebung.
21Ebpekeuma is ebpekezezaat te mekesesalà, piru is menge metazeng ne ebelesan te meupiya.
22Is ketiǥeyunan te etew he metazeng ne egkepengevilin te menge apù din, iyan, is azen te mekesesalà, iyan ebpekaangken duen is menge metazeng.
23Dekelà pezem he keuyaǥan is egkekuwa ziyà te tanà te egkengeey-eyuwan, piru kenè dan egkepulusan heini tenged te kenà metazeng is ebeelan te zuma.
24Wazè nu pelenggaa is anak nu emun kenè nu ebmensuwen, wazè nu heini pelenggaa. Emun pelanggè nu sikandin, edtulizen nu is mezaat he betasan din.
25Kenà ebitilen is menge metazeng, iyan, ebitilen mulà is kenà menge metazeng.