Erubasa 10:23-32

²³Is igkelipey te tulebung iyan is kebaal te mezaat, piru is igkelipey te etew he zuen din kedsavut iyan is kebpengungubpaan duma is ketau.

²⁴Iring te is igkeherati te etew he mezaat is menge ulaula zin, ne egkelaus egkehitavù diyà te kandin, is etew he metazeng, egkekuwa zin is edtinguhaan din.

²⁵Emun ebpekeuma is menge penggezam te ked-ubpà he iring te vagyu, egkehanew is lalung he etew, piru is etew he metazeng kenà egkewaleng, edhitindeg he melig-en.

²⁶Iring te sukà he ebpekengingilu te ngipen, wey is evel ebpekepeluhà te mata, ne is peǥulen he etew igkererengiti zaan te edsuǥù kandin.

²⁷Is kedtahud te Nengazen ebpekepeluǥayad te untung, piru mevavà is untung te lalung he etew.

²⁸Kelipey is egkeperateng te etew he metazeng, iyan, is ebperetengen te etew he mezaat is menge ulaula zin, ne kenè din egkekuwa.

²⁹Is kedsunud te menge suǥù te Nengazen iyan iliyan te menge metazeng, iyan, is menge lalung he edsupak kayi ne egkengezeetan mulà.

³⁰Is menge etew he metazeng, ebpedayun is ked-ubpè dan, iyan, is menge etew he mezaat is menge ulaula zan, ne kenà ebpekepedayun is ked-ubpè dan kayi te tanà.

³¹Is menge lalag te metazeng he etew ebpekeveǥey te ketau, iyan, is ebpengeǥiyen te etew he limbungan ne kenà ibpepedayun.

³²Is metazeng, egketuenan din ke hengkey is dait he egkeǥiyen, iyan, is menge etew he mezaat is menge ulaula, ne winalì dà is egketuenan dan.