Dutaronome 30

1

4

6

7

8

9

10

12

13

18

19

24

25

26

30

31

32

33

34

¹Epapu nambame kata lama ingyuo elyape keta pisingipi koo keta pisingipi dolapona mendaki rombo palyarami lao jilyu. Dopa piya kande dokopa nakamame yuu liti wakale wakale wambu palaminyi dupwana nakamana Kamongo Anatu dokome nembeya kande dokopa nambame kata mendaki rombo palyalapape leya kande doko suu pyao kararami.

²Dopa pyuo paramo karo dokopa nakamape nakamana para pyao nyeraminyi dupwape kamba kapu kyuo Kamongo keta pyamalyuo karo nakamana mona peparaeme nambame banya mawa pii dakepa langilyu dupwa suu pyao manjo kararami ramo dokopa nakamana Kamongo Anatu dokome nakama kando sakame kumuo karara.

³Karapala baame yuu muu wakalende nakama nembeyamo bolombalo lao peyami dupwana piso range nyuo minyuo epo nakama dee kapa palyuo karalapa lao pira.

⁴Nakama yuu nanesa pinjingi dolapona bolombalo lao pao kararaminyipape nakamana Kamongo Anatu dokome range yapo nyuo pyasapala lanyuo epara.

⁵Lanyuo epo nakamana imbwange kauwangepe palenge yuu doko nyuo palipa lara. Dopa pyuo nakamana kauwange dupwa kareyaminyipape nakama kamame ulupili ingyuo andakinyi pyambwaramo palyuo karo pirami.

⁶Dopa pyuo karo dokopa nakamana Kamongo Anatu dokome nakamana monarena baapa rape rape lao karenge renge doko jeramopa nakamana mona imambupi peparaeme baa mona retapala yuu dokona nao palyuo karalu kararami.

⁷Dokopa nakamana yanda pimwai dupwame randa joo koo keta palyuo karaminyi dupwa Kamongo dokome koo keta pyambungi dupwana lao langiyamuli pyuo pyakamira.

⁸Dokopa nakamame baapa rape rape lao karo mawa pii lapo epapu langilyu dupwana minyuo kararami.

⁹Kamongome nakama pirami dupwana mona kare kare karo kamonganyi pyambuo karara. Dopa pyuo nakama wane wanakepe malu manjo mena bulamakao pungi palyuo piramopa nakamana ee dupwana nenge malu seramopa manjo narami. Dokopa baame rae maiyuo nakamana kauwange dupwa kamonganyi pyambuyamuli pyuo nakama kamonganyi pyambwara.

¹⁰Dopa pirako doŋo nakamame baapa rape rape lao buku dakena banya lowa p dupwape mana pii dupwape pyasi palamo dupwa kamba laa narami. Dopa pyuo karo dokopa kapu kyuo pao baa keta nakamana mona peparaeme mona reto kararami.

¹¹Dopa pyuo kararami dokona mawa pii epapu nambame jilyu doko kamame koko pao randa naowalende minyuo pyuo kararami lao jilyunde daa.

¹²Mawa pii dake yake ketae silyande daaŋa. Nakamame piso soo, Dokona namwa soo nyepala warombo soo rape rape lao karalapase lao apimi yake panda pulyuo papala namwana lao nyuo minyako isa eparase? laa narami ingilyamo.

¹³Dee mende mawa pii doko ipwa kota dumuwangu silyande daaŋa. Dokona nakamame piso soo, Namwa warombo soo rape rape lao minyuo pyuo karalapase lao apimi ipwa kota yalo nyuo minyuo epakarase? laraminde daa.

¹⁴Doko daa. Dae nakama pipya repeta angi suu pingi monape dokona palipyamo doko nakama maso kambunya lao karaminyi. Dokona lao epapu mawa pii doko warombo soo karalapape.

¹⁵Epapu nambame nakama kata lama ingyuo lasaka pilyu. Kata mendena rombo palyuo parami ramo letena renge nyepala yuu gii peparae kapa palyuo kararami. Kata wakale mendena rombo palyuo parami ramo koo pyuo karapala kwaeyo kumuo parami.

¹⁶Nakamana Kamongo Anatu dokona mawa pii epapu nambame nakama jilyu dupwa warombo soo pyuo karo baa mona reto baa leyamuli pyuo pyuo banya lowa pii dupwa mondo lao reto minyuo pyuo karo pirami ramo dokopa nakama kamonganyi pyambuo wambu rara malu ingyuo palyuo kararami. Dokopa nakamana Kamongo Anatu dokome yuu nakama nyuo palya panya pilyaminyi dokona nakama elyape keta pisara.

¹⁷Dopa piramopape nakama sili see nale lao kamba lao wambu menge dupwame pii elyape larami soo mee bange anatuŋu lao lakandenge lapo lakandala parami ramo doko Anatumi nakama pyao isa kanapena piso kokwa soo nembara lao epapu dakepa nambame nakama repe repe langilyu.

¹⁸Doko nakama ipwa Jotane yalo yuu enenge dokona palya karala panya pilyaminyi dokona yuu gii andarele palyuo kara narami.

¹⁹Dokona nambame epapu renge kata lama jilyu dolapo lete karenge dokope kumungi dokope dee Anatumi elyape keta pisingi dokope dee koo keta pisingi dokope jilyu. Jepala nambame yake yuupi dolapome nakama angi renge dolapona mende rombo palyuo nyeraminyi dokona usinisi lakana lao kee leto. Lete karenge renge doko rombo palyalapape.

²⁰Nakamana Kamongo Anatu doko mona nyepala baapa rape rape lao yaki nyii nalapape. Dokopa nakamape nakamana wane para pyao manjo paraminyi dupwa pipya yuu nakamana imbwange Aporakame Aisake Jekopemoo mairuŋu lao lalu lao lao kaeyamo dokona yuu gii andarele palyuo kararami ingilyamo.