1Moize Izelayɛle nuiti pɛ tolini, é ɠɛ ti ma: À woilo, Izelayɛle nuɓusɛiti, deveiti ta tɔgiti kaa, gè feezu wo ya za. À ti ɠala, wo ti zo, wo ɗa ti ɠɛ.
2Ɠɔoɠɔ GALAGI da-ƓALAGI minazeɠe boni de ʋɛ, Ɠɔɔlɛɓe gizei ma.
3É la ga de-mɛmɛwolani gila nɔ ɠa Ɠɔoɠɔ GALAGI minazeɠeni ti ʋɛ, kɛlɛ dea ɓalaa, dɛi pɛ de ʋɛ za, de vulua.
4Ɠɔoɠɔ GALAGI ɓɔɛni wo ʋɔ, ɠaazuni ta ɠaazu, gizei ma, abui zaama.
5Naama ziɛgi zu, gè loni wo yɔɠɔzu, wa Ɠɔoɠɔ GALAGI, gè daawooi laazeeli wo ma. Mazɔlɔɔ wo luani abui ʋa, wo la ɠɛni lɛɛni gizei ma. Pɛtɛ nii é boni, é ɠɛni:
6«Nà ga Ɠɔoɠɔ GALAGI ɗa-ƓALAGI, nii é è ɠulani Ezipete yooi ʋa, duɔla ʋɛlɛi wu.
7«Gala kiligaa ti mina ɠɛ è ʋɛ nɔ̀un polu.
8«Mina ani maaniini saɠa ɓɔɠɔ ʋɛ ɲɛgɛlɛin, ga anii tanɔpɛ baaɠulaba, niiti ti geeɠɔlɔgi zu, ɓaa niiti ti zooi ma, ɓaa ziɛiti bu zooi wu.
9Mina nɔkɔ ti wu ɲɛgɛlɛin, mina ti lɛbi ɲɛgɛlɛin, mazɔlɔɔ nà, Ɠɔoɠɔ GALAGI, ɗa-ƓALAGI, nà ga GALAGI toloai, nii a ɗa ɠɛɛɠɛiti ta-vaa ɲɔi ʋotokula ti-lointi ma, eyɛsu é zeeli yamanii zaʋasiɛi ta naanisiɛi ma, niiti ti màayoseɠezu ʋɛ.
10Kɛlɛ nà ɗa wooɠɛɠiladai ɠɛ, eyɛsu é zeeli yamani waagilasiɛi (1 000) ma, naati bɛ, niiti ti nɛ̀ɛzu ʋɛ, ta ti nà-deveiti sosu.
11«Mina Ɠɔoɠɔ GALAGI ɗa-ƓALAGI laaseigi wo fuun ɲɛgɛlɛin, mazɔlɔɔ Ɠɔoɠɔ GALAGI ɠa naama nui leve ga sɔba nu, nii é daaseigi wosu fuun.
12«Dooɠo foloi leve ga maaɲɛɛba voloi, eɠɛʋelei Ɠɔoɠɔ GALAGI ɗa-ƓALAGI ma levei veai la è ya.
13Ɗa botii ɠɛ folo lɔzitai zu, è ɗa-wotii kpein kɛ.
14Kɛlɛ folo lɔfelasiɛi ɠa ga Ɠɔoɠɔ GALAGI ɗa-ƓALAGI ná-dooɠo foloi. Mina boti nɔpɛ kɛ ma, ɗa-o, è-loun zunuiti-yo, è-loun anzanuiti-yo, ɗa-wotiɠɛ zunuiti-yo, ɗa-wotiɠɛ anzanuiti-yo, ɗa-wotiɠɛ nikɛiti-yo, ɗa-zoovalegiti-yo, anɛɛ ɗa-logania kpein, anɛɛ wɛɛinti niiti ti zeini è ɠɔɠɔma, naa ɠa a kɛ, ɗa-wotiɠɛ zunuiti ta ɗa-wotiɠɛ anzanuiti ti la looɠo ga è ɠɛʋele.
15Ɗa ɠizɛ su ga è ɠɛni ga duɔi Ezipete yooi zu, Ɠɔoɠɔ GALAGI ɗa-ƓALAGI ɠa é è ɠulani ná ga ná-zeeɠaaɓaai. Naa ɠa é ba, Ɠɔoɠɔ GALAGI ɗa-ƓALAGI è levea ga è dooɠo foloi maaɲɛɛ.
16«È-ɠɛɛ lɛbi ta è-lee, eɠɛʋelei Ɠɔoɠɔ GALAGI ɗa-ƓALAGI ma levei veeni la è ya, naa ɠa a kɛ è-zii ma voloiti suɠooza, è ɗa-eteai ziɛ undaanɛɛi zu, naama yooi zu nii Ɠɔoɠɔ GALAGI ɗa-ƓALAGI feezu è ʋɛ.
17«Mina nu ʋaa ɲɛgɛlɛin.
18«Mina wɛɛnziɛ bo ɲɛgɛlɛin.
19«Mina unma wo ɲɛgɛlɛin.
20«Mina zɛɛ zeele woo wo ɲɛgɛlɛin è-zeiɲɔɠɔi laalɔɠɔma.
21«Mina ɠaazuɠula ɲɛgɛlɛin è-zeiɲɔɠɔi anzai ʋa. Mina ɠaazuɠula è-zeiɲɔɠɔi ná-pɛlɛi ʋa, anɛɛ ná-kpalagi, ɓaa ná-botiɠɛ zunui, ɓaa ná-botiɠɛ anzanui, ɓaa ná-nikɛi, ɓaa ná-soovalegi, ɓaa ani nɔpɛ é ga è-zeiɲɔɠɔi nɔnɔ.»
22Wooiti kana, Ɠɔoɠɔ GALAGI ti woni wa-nuɓusɛiti ma, é wooɠula la gizei ma, abui zaamaʋɛ, tonaɓiingi zu, ta ɓumugi, é la tanɔpɛ daani ma. É ti zɛʋɛni kɔtu ɠokolo felegɔiti ma, é ti ve zèa.
23Wo wooi mɛnigai ma, nii é ɠɛni ɠulazu kpidii zu, tama abui gizei ʋa, wo ʋaani pɔ̀ bɛ, wa wa-wolodama ɠundiɠiiti kpein, ta wa-ɠɛwolaiti,
24wo ɠɛni: «Wɛlɛ, Ɠɔoɠɔ GALAGI gá-ƓALAGI ná-lɛbiyai lɛa ga giye, ta ná-bɔɔlɔi ɠɛʋelei, gi gooi mɛniga abui zaama, za gi kwɛɛga ga GALA ka zoo é ɓɔɛ nui ʋɔ, naa zoo é yɛ ná, é yɛ vulua.
25Kɛlɛ niizu, lee vaa zu gá li ɓɔɠɔ lɔɔzu saai zu? Mazɔlɔɔ abu wolai nii ɠa gi undaaʋili. Ni gá yɛna Ɠɔoɠɔ GALAGI gá-ƓALAGI wooi mɛnisu, gá za.
26Nu ɠila ɓalaa ka ná nɛi eteai zu, nii é zɛnvu su ƓALAGI wooi mɛniga ga gi ɠɛʋele, é ɗa ɓɔɛ abui zaama, é yɛ vulua, é la zaani?
27Li ɗa ɓɔɠɔi, è woilo naa kpein ma, nii Ɠɔoɠɔ GALAGI gá-ƓALAGI bosu, naa ʋolu è ti wo gi ma, gá woilo ma, gi kɛ.»
28Ɠɔoɠɔ GALAGI wo-wooiti mɛnini, wo ɠɛai ma ɓɔɛzu pɔ̀, é ɠɛ mà: «Gè niima nuɓusɛiti daawooiti mɛniga, ti bogai è ma, gè vaa bu.
29Ni nɔ ta la kɛʋele ʋagɔi naati makɛna, ti lua bà ti-yiimaʋɛ, ti nà-deveiti so yeenɔpɛ, nii a kɛ tiya-o, ti-mavofodaiti-yo, ti undaanɛ eyɛsu ɠɔ!
30Li, è ɠɛ ti ma, ti ɠale ma ta-zeɠe ɠotaiti bu.
31Kɛlɛ ɗɔun, ɗa yɛsu bà ʋɛ, nà deveiti, ta tɔgiti, ta faliiti bosu è ma, nii ɗa ti ɠala da, ti so, ti ɗa kɛ zooi naa zu, nii gè feezu ti ʋɛ ga tɔnɔ.»
32Nii Ɠɔoɠɔ GALAGI wa-ƓALAGI ma levei vea wo ya, wa naa zo, wo ɗa kɛ, à mina zeɠe gila kpalaa ba.
33Wa ziɛ ga pelei naa nɔ ɲɛgɛlɛin, nii Ɠɔoɠɔ GALAGI wa-ƓALAGI wo leveai ma, naa ɠa a kɛ wo ɗa-eteai ziɛ undaanɛɛi zu, wo-zii zuɠooza, zooi naa zu, nii wo sɔlɔɔsu ga wɔnɔ.
