Dad Fngewe 5:3-17

³Na i kalak i libun mlafà yaanan, too mi salngad i tnab, na i taluan too mladal, salngad i fngalo,

⁴bay di gusenan too nun kféétan, na too gamgebe di kaflayam.

⁵I libun gambet ani, alò gamgebe ge di banwe i dad mati, na i dalan gumagun, dunan dalan salu di fati.

⁶Laan faldam i dalan gumlawilan, na laan gadè, bay i dalanan too bigkò.

⁷Dad ngàgu, too gamu flinge deg, na nangyu glifet i mangu di gamu ani.

⁸Too gamu fawag di libun gambet ani, na nang gamu fdadong di gumnean,

⁹du ku salu gamu di kenen, lana i kgafè gamu, na là mlo malmo gamu di falel i dad to labè, i landè kakdo.

¹⁰I dad to làyu dilè nwèla di gamu kdee dad knunyu, na too gamu faflayam mwè i knunyu, bay baling nfun i dademe.

¹¹Na di fan kafto i nawayu kadang, mlanu gamu mdà di kalmo ilawehyu.

¹²Na msal gamu kadang manyu, “Fye moon di munafa, ku fanlingegu i tdò deg, na ku fanlingegu moon i kngak deg.

¹³Di muna, là agu mayè flinge i dad tamdò deg, tatìgu bayà i tdòla deg.

¹⁴Na ani gukelgu, nun sasè kyàgu di mata i dee dadto.” Ani manyu kadang.

¹⁵Kaflingengu dun, ku fkahta di kinum, én guminumyu di gamuguminum, én alòyu too kanbong nawa i gamu yaan.

¹⁶Landè gufyeyu di dad ngàyu di dademe libun ise yaanyu.

¹⁷I dad ngàyu lamnok sa moon di ifatyu, na gamtabeng ale gamu, ise baling ku di dademe to gutmabengla.