3 Na i kalak i libun mlafà yaanan, too mi salngad i tnab, na i taluan too mladal, salngad i fngalo,
4 bay di gusenan too nun kféétan, na too gamgebe di kaflayam.
5 I libun gambet ani, alò gamgebe ge di banwe i dad mati, na i dalan gumagun, dunan dalan salu di fati.
6 Laan faldam i dalan gumlawilan, na laan gadè, bay i dalanan too bigkò.
7 Dad ngàgu, too gamu flinge deg, na nangyu glifet i mangu di gamu ani.
8 Too gamu fawag di libun gambet ani, na nang gamu fdadong di gumnean,
9 du ku salu gamu di kenen, lana i kgafè gamu, na là mlo malmo gamu di falel i dad to labè, i landè kakdo.
10 I dad to làyu dilè nwèla di gamu kdee dad knunyu, na too gamu faflayam mwè i knunyu, bay baling nfun i dademe.
11 Na di fan kafto i nawayu kadang, mlanu gamu mdà di kalmo ilawehyu.
12 Na msal gamu kadang manyu, “Fye moon di munafa, ku fanlingegu i tdò deg, na ku fanlingegu moon i kngak deg.
13 Di muna, là agu mayè flinge i dad tamdò deg, tatìgu bayà i tdòla deg.
14 Na ani gukelgu, nun sasè kyàgu di mata i dee dadto.” Ani manyu kadang.
15 Kaflingengu dun, ku fkahta di kinum, én guminumyu di gamuguminum, én alòyu too kanbong nawa i gamu yaan.
16 Landè gufyeyu di dad ngàyu di dademe libun ise yaanyu.
17 I dad ngàyu lamnok sa moon di ifatyu, na gamtabeng ale gamu, ise baling ku di dademe to gutmabengla.
