Cântico 8

1

2

3

4

5

6

7

8

¹Ndee xekyvy va'e rire, xexy omokambu va'ekue ae! Ha'e rami va'e rire tape rupi rovaexĩ vy xee roayvu 'rãgue avave rei xejou vai e'ỹ re.

²Xee rogueraa vy rogueroike 'rãgue xexy ropy. Ha'e gui ndee xembo'e 'rãgue. Ha'e rã ndevy ame'ẽ 'rãgue rey'u aguã vinho iporãve va'e regua, ha'e xe yvyra'a rykue.

³Ndeaxua regua oĩ 'rãgue xeakã guýry, ha'e rã reiporu kuaa regua ma xekuavã 'rãgue.

⁴Jerusalém memby kuery, ajerure pẽvy: pemomyĩ eme rojoayvua, tove toke ranhe, ha'e ae ovyxe e'ỹa ja.

⁵Mava'e tu peva'e, tekoa e'ỹa katy gui oẽ ouvy vy guembiayvu reve joe ojeko jogueruvy va'e? Maçã'y rembypy guy py xee romomyĩ. Ha'e py ae ndexy nderereko'i raka'e. Ha'e py ae ju nekuavãare oendu raka'e haxy va'e.

⁶Emoĩ xerery nekuraxõ re imbojaarã rami, ndejyva re guive. Mba'eta jajoayvua ma manoa rami ipo'aka. Ha'e rã takãte'ỹ ma yvyra rupa rami nda'evei ete va'e. Ha'e va'e regua tapyĩ ma hendy revegua, tata rami okai oiny va'e.

⁷Yy tuvixa va'e teĩ nomboguei 'rã jajoayvua, yakã ikuai va'e ndojao'i 'rã. Joayvua repyrã amongue oguereko va'e ha'e javi ome'ẽ teĩ mba'everã ndovarei.

⁸Ore kuery orereindy roguereko ikã e'ỹ teri va'e. Mba'e tu rojapo 'rã ixupe gua'yxyrã re ojerurea ramo?

⁹Tetã kora ha'e oiko va'e rire ixupe rojapo 'rãgue peteĩ torre prata guigua. Ha'e rã okẽ va'e rire ronhovã 'rãgue yvyrape yary guigua py.

¹⁰Xee ma tetã kora, ha'e rã xekã ma torre rami oĩ. Ha'e rami rã xerembiayvu xerexa vy xererovy'a 'rã.

¹¹Baal-Hamom py Salomão oguereko peteĩ uvaty. Ha'e va'e omboaxa raka'e opena va'erã kuery pe. Ha'e ramo hi'a rekovia peteĩ-teĩ ogueru ixupe mil hatã'i va'e prata guigua.

¹²Ha'e rã xe uvaty ma xereve ae oĩ xee aipotaa rami areko aguã. Ha'e gui ndee Salomão, eju ejopy mil hatã'i va'e, ha'e hi'a re opena va'e kuery ju duzentos 'rã ojopy.

¹³Ndee yvotyty rupi reiko va'e, nhaneirũ kuery oenduxe okuapy ndeayvua. Xee voi taendu.

¹⁴Xerembiayvu, eju pojava! Enha ejuvy guaxu e'ỹ vy guaxu ra'y yvyty heakuã va'e áry rupi opo-opo ouvy va'e rami.