Cântico 2

1

2

3

4

5

6

7

8

¹Xee ma rosa poty Sarom rupigua rami, ha'e yvoty yvyugua rupi ikuai va'e rami.

²Yvoty juu mbyte oĩ va'e rami ae avi kunhataĩgue mbyte xerembiayvu iporã.

³Ha'e gui yvyra ikuai va'e mbyte maçã'y hi'aĩ va'e rami kunumigue mbyte xerembiayvu iporã. Ikuaray'ã py aguapyxe vai, ha'e hi'a voi he'ẽ porã xevy.

⁴Xereraa opy ja'o okaruaty py, ha'e xe'áry rupi omopu'ã bandeira xerayvua kuaa ukaarã.

⁵Anhemombaraete 'rã uva pirekue py, anhenhandu porã 'rã maçã ha'u vy. Mba'eta ayvu vaipa vy naxepytuẽ kuaavei.

⁶Ijaxua regua toĩ xeakã guýry, ha'e rã oiporu kuaa regua ma taxekuavã.

⁷Jerusalém memby kuery, pendevy pe ajerure guaxu ha'e guaxu kunha ka'aguy rupi ikuai va'e rupi: Pemomyĩ eme rojoayvua, tove toke ranhe, ha'e ae ovyxe e'ỹa ja.

⁸Aendu xerembiayvu ijayvu rã. Ma'ẽ, ha'e ou pojava yvyty áry rupi, yvy'ã ikuai va'e rupi opo-opo ouvy.

⁹Xerembiayvu ma guaxu e'ỹ vy guaxu ra'y'i rami inhakuã va'e. Ne'exa, orero mbotya kupe py hi'aĩ, janela rupi oma'ẽ ho'amy, oexa pota ho'amy janela jokoa pa'ũ gui.

¹⁰Ha'e gui xerembiayvu ijayvu vy aipoe'i xevy: Xerembiayvu, epu'ã ke. Xemba'e porã, eju.

¹¹Mba'eta yro'y oaxa ma, oky voi oaxapa ma.

¹²Yvoty henhoĩmba ma yvy re, ovaẽ ma guyra kuery onhe'ẽ aguã ára. Pyku'i voi onhe'ẽ nhendu ma nhandeyvy rupi.

¹³Figo'y voi ijypy ma hi'a aguã, uva poty reakuã voi nhaetũ ma. Epu'ã na xerembiayvu. Xemba'e porã, eju ke.

¹⁴Xerymba apykaxu, ita pa'ũ ha'e itaova yvateve renhemia rupi reiko va'e, exa uka na nderova, ha'e taendu ndeayvu. Mba'eta ndeayvua he'ẽ, ha'e nderova ma aexaxe vai va'e.

¹⁵Pejopy na mbyku ha'e mbyku'i uvaty ombovaipa va'e, mba'eta oremba'e uvaty rupi ipotypa ma.

¹⁶Xerembiayvu ma xemba'e, ha'e xee ma imba'e aiko. Ha'e ma omongaru 'rã guymba kuery yvoty ikuaia rupi.

¹⁷Xerembiayvu, ára yro'y rei'i ha'e pytũ e'ỹ teria ja ejevy ju. Enha ejuvy guaxu e'ỹ vy guaxu ra'y'i rami, yvyty itatya rupi.