Buka Linge 78:5-40

⁵Gaia te nia hevei horu na bosa vania Jacob, me hera nina lei vetena na vure ni Israel, A gaia te keikerira na lei kukuada ge kara taraira na lei daledira nia nina vetena.

⁶Keri ke, ge na vavata ke mai kara ghilalai ghua. Ge gaira ghua, kara taraira na lei daledira

⁷Keri ke, gaira ghua kara ghanaghana kodo itatana God, ma kara bei nighi ponolio na hava te gonighi tua: Ma kara taonighi haia na lei nina vetena.

⁸Ge kara bei vaghara gea na lei kukuadira tara diu bosa mara hughuhughu didira ghanaghana ta God te mua kakai, me mua kabu ngasi didira taluutuni itatana.

⁹Didira malaghai ni kisu mate tana Ephraim, tara pitu dila tua, kolui didira baghe mana kuali. mara sama polo tana bongi ni kisu mate.

¹⁰Gaira tara mua taonia nina baubahu God. Mara mua liona ge kara taonia nina vetena.

¹¹Gaira tara nia ponolio na hava te gonia vanira na lei butuli tara righighi te nei vanira.

¹²Mara vaevane so na lei kukuadira, me gonighi na lei butuli God. Tara nanatana i Zoan tana komu i Egypt.

¹³Ma gaia te vokasia na tahi me hola halavura. Mana tahi te tughuru dato vagha na voko i lilighidira i levu mi levu.

¹⁴Mi tana dani gaia te hulira nia na parako, mi tana bongi na marara ni lake.

¹⁵A gaia te tagi vokai na vatu tana bona mamaha, me hera na beti te siki dato mai loka ni vatu vagha na beti toghotogho.

¹⁶A gaia te nea na bei ge tave horu mai loka ni vatu, me nea vei tave vaghi na lei betitina.

¹⁷A gaira tara tona haliu so na kabu tangohahi tana matana God. Mara diu bosana na puku ni haba tana bona mamaha.

¹⁸A gaira tara liona ge kara tabotaboa God tana tobadira, ge ra nia kokoe na vanga tana tobadira itatana.

¹⁹Ma gaira tara pasapasa God, mara ghaghua, “Ke mua tangomana God ge ke heghita siki vanga, ilokana na bona mamaha eni.”

²⁰E utuni so, agaia te tagi voka na vatu me tave hovu mai ga na beti toghotogho. me ke tangomana so ge ke heghita na vanga, me ke hera kulana vure ni vinahi.

²¹Ma maghutu te rongovira ge rutu, me matera kulana vure nia na lake, me sule

²²Na pukuna tara mua taluutunia God. mara mua ghanaghana mavaa ghua gaia te righitaonira.

²³Keri ge keikeria na parako ge ke hahangavi; me hangavighi na lei mataula i kokou.

²⁴Ge kovalaha horu na maana vanira ge kara ghania. Agaia te vahera na vanga ni kokou.

²⁵Keri ge ra ghania ghadira na vanga na lei tarunga, Ma God te va hera udolu na vanga te liodira.

²⁶Agaia te nea na ara ge tavuvu mai i ulu, me hulia na koburu nia nina maana te laga.

²⁷Ma gaia te vetenara na manu vanira kulana na vure. Tara subo vaghara na saghalea tana posoposo ni tahi.

²⁸Mana manu tara tumu horu kililia na bona tara ghahara iga, Talighutia na vale tapole.

²⁹Mana vure udolu tua tara vanga mara nia mahu, Na hava God te hera mai te liodira.

³⁰Hauva mara mua mua na ghaniana, na vanga te liodira ngangata.

³¹Ma God te rutu vanira tua, ge matera na eli mane laga itadira, maia ghua na lei gari mane ni Israel.

³²Me nera mana te vagha keri na vure tara nia tona haliu so na tangohahi hahi, mara hove na taluutuniani nina na lei butuli.

³³Keri ge va soko butoi na bongidira, mana voladira kolua nia na kakale.

³⁴Tana bona te matera na balu, ma gaira udolu tara ririu oli vania. tara tughu lio mara holohaba.

³⁵Vaho ge ra ghilala God te pilupilura Me mai hui olira gaia na puku ni haba.

³⁶Hauva mana bosadira te sori udolu, me taho tua siki utuni tana hava tara bosaa.

³⁷Gaira tara mua talu mavaa nia na tobadira, mara mua pangotia nina baubahu.

³⁸Hauva, ma gaia te arovira so kula na vure me talu kehai so na paludira me mua nira ghighirou. Subo na bona gaia te lavi olia nina rutu vanira.

³⁹Agaia te ghanaghana gaira tara tinoni ni maramana vamua, te vaghara na ghuri tona haliu vamua.

⁴⁰Engiha na tughuru ni hughutiana tana bona mamaha me ngiha na bona tara nea ge dikalio.