Buka Linge 78:19-47

¹⁹Ma gaira tara pasapasa God, mara ghaghua, “Ke mua tangomana God ge ke heghita siki vanga, ilokana na bona mamaha eni.”

²⁰E utuni so, agaia te tagi voka na vatu me tave hovu mai ga na beti toghotogho. me ke tangomana so ge ke heghita na vanga, me ke hera kulana vure ni vinahi.

²¹Ma maghutu te rongovira ge rutu, me matera kulana vure nia na lake, me sule

²²Na pukuna tara mua taluutunia God. mara mua ghanaghana mavaa ghua gaia te righitaonira.

²³Keri ge keikeria na parako ge ke hahangavi; me hangavighi na lei mataula i kokou.

²⁴Ge kovalaha horu na maana vanira ge kara ghania. Agaia te vahera na vanga ni kokou.

²⁵Keri ge ra ghania ghadira na vanga na lei tarunga, Ma God te va hera udolu na vanga te liodira.

²⁶Agaia te nea na ara ge tavuvu mai i ulu, me hulia na koburu nia nina maana te laga.

²⁷Ma gaia te vetenara na manu vanira kulana na vure. Tara subo vaghara na saghalea tana posoposo ni tahi.

²⁸Mana manu tara tumu horu kililia na bona tara ghahara iga, Talighutia na vale tapole.

²⁹Mana vure udolu tua tara vanga mara nia mahu, Na hava God te hera mai te liodira.

³⁰Hauva mara mua mua na ghaniana, na vanga te liodira ngangata.

³¹Ma God te rutu vanira tua, ge matera na eli mane laga itadira, maia ghua na lei gari mane ni Israel.

³²Me nera mana te vagha keri na vure tara nia tona haliu so na tangohahi hahi, mara hove na taluutuniani nina na lei butuli.

³³Keri ge va soko butoi na bongidira, mana voladira kolua nia na kakale.

³⁴Tana bona te matera na balu, ma gaira udolu tara ririu oli vania. tara tughu lio mara holohaba.

³⁵Vaho ge ra ghilala God te pilupilura Me mai hui olira gaia na puku ni haba.

³⁶Hauva mana bosadira te sori udolu, me taho tua siki utuni tana hava tara bosaa.

³⁷Gaira tara mua talu mavaa nia na tobadira, mara mua pangotia nina baubahu.

³⁸Hauva, ma gaia te arovira so kula na vure me talu kehai so na paludira me mua nira ghighirou. Subo na bona gaia te lavi olia nina rutu vanira.

³⁹Agaia te ghanaghana gaira tara tinoni ni maramana vamua, te vaghara na ghuri tona haliu vamua.

⁴⁰Engiha na tughuru ni hughutiana tana bona mamaha me ngiha na bona tara nea ge dikalio.

⁴¹Agaira tara tabotaboa haia God, Mara nea te vahaghitailia God, Tabu ni Israel.

⁴²Gaira tara mua ghanaghana olia nia maana, mana bongi te volara tana limadira ghadira levunimate.

⁴³Ma nia nina maana te nei nia na lei butuli te haeharegha tana nanata i Zoan, lokana na pari Egypt.

⁴⁴Ma gaia te nei na lei beti tavetave ge liliu ni ghabu: me taho na beti kara inuvia na vure ni Egypt.

⁴⁵Gaia te vetenara na lango vanira ge ke vahaghitailira, mana ovu ni kulau ke dikalai na komudira.

⁴⁶A gaia te vetenara na ma ka me ghanighi ghadira na vanga. Mana puku te pisui didira na leghai.

⁴⁷Gaia te matei didira na ghai, ghania nia na uha binoru, Ma didira saghau te mate nia na kolobu ni labota.