Buka Linge 37:8-37

⁸Betoa nimua na rutu, ko ririu oli tana hava to gonia: bei lio dika vanira rana keha: Ke huligho va gea tana halautu te dika.

⁹Rana tangotangodika kara taghalaghi nira: Mara hei tara nia kikinima God, Kara loghoa na pari ni tumu va.

¹⁰Mi tana pile bona, gaia na tangotangodika ke tagha haliua, ko kenea manaa, ma kara tagha haliura tua.

¹¹Ma hei vamua te kabu totovongona ke loghoa na pari ni tunuva, me ke nia togo na mabo iga.

¹²Gaia te tangohahi te kenea na dikalana ahei te gehegehe uto, me girigirighi na livona vania

¹³Ma Lord te kia vamua, na pukuna te righia na bongidira te dutu ni sara mai tua ge ke taghalaghinira.

¹⁴Rana tangotangodika tara suai dida na isi, mara lohighi dida na baghe ge kara labura nia tara bona mara kosimogo ma kara matera ara hei tara lutu maemane

¹⁵Dida na isi ke sutu potai na lokadira, ma dida na baghe ke tagoti.

¹⁶Me uto va nina lologho pile na tinoni uto tatana nina lologho au na tinoni tangotangodika.

¹⁷Na pukuna a Lord ke hola kehai na lagadira tara tangotangodika, me ke righi taonira tara lutu uto.

¹⁸Ma Lord ke righitaonira ara hei tara gehegehe uto ma kara holaa na taba te kabu kasila.

¹⁹Kara mua vahaghitaili tana bona ni bongi dika sughua tana bongi ni vitolo kara loghoa so na hava te manadira.

²⁰Rana tangotangodika kara mate, mana ghana na levunimate na Lord, Kara dudu vaghara na buburu.

²¹Rana tangotangodika tara hola kau mara mua tutughu oli, na tinoni uto te vei arovi me hevei nia na lio te maemane.

²²gaira te vautora na Lord Kara loghoa na bona kara sopou ga. Mara hei ke varangara kara ghuru horura.

²³Ma Lord te uhulia, na sakutuana na tinoni ivei ke va iga me righitaonira ara hei tara holopangotiana na Ahana.

²⁴Kara saisari keba ke, ma kara mua tumu na pukuna Lord ke tabe daroa nia so na limana.

²⁵Inau tu tinoni vaolu, mu saravia tua na tonikamaagu, mu mua righi topoa mua siki tinoni uto ke righi leara na ahana aua hei pe ke mua kutira dalena kara nongi vanga.

²⁶Na tinoni uto te hevei nia na toba te maghora me uto, me hangara rana keha, ma dalena kara loghoa na vauto.

²⁷Ko ririu sania na tangotangodika, mo ko gehegehe uto, mo ko kabu kasila ivei te talugho ga Lord

²⁸A Lord te dolovia na uto, me mua nira ponolio ara hei tara maemane: Me righi taonira ke va me va, me ke tagha laghinira daledira tara tangotangodika.

²⁹Rana maemane kara loghoa na komu ni tunuva; ma kara sopou ga ke va me va.

³⁰Na mangana na tinoni manaha te bosaa na lei bosa manaha, mana ghiduna te bosaa na lei bosa maemane.

³¹Na vetena nina God tana tobana, mana sakusaku tuana ke mua dororo.

³²Na tinoni ghighirou te toghatogha na tinoni uto me kenea ivei ke nea ge ke matea.

³³Ma Lord ke mua lubatia a hei te tangohahi ge ke laga vule, pa rana maemane kara hurura tana bona ni dete.

³⁴Ko pitu dila Lord, mo ko tona taonia na halautuna ke ghaedatogho me ke vahegho na bona ko sopou ga, ma rana tangohahi kara tapusi keha ka, mo ko righi kalea so.

³⁵Inau heghegu tu righi kalea ta nina lavi mataghu na tinoni tangohahi, E talu tatea heghena te vagha na ghai lodu ni leao.

³⁶Mu rei va mu mua righi sodora, sakai vamua ku kenera ke, mu ku mua sodora tua.

³⁷Ko righia gatu na nilabuna na tinoni te maemane kolua nia na tinoni uto te loghoa na mabe tana volana, na dalena kara taonia va na nilabu te loghoa.