Buka Linge 119:51-101

⁵¹rana talunagho tara pasapasau mara mua ghanaghana mavau. Hauva inau tu mua nia murilio nimua na vetena.

⁵²Inau tu ghanaghana haia nimua na vetena haulaghi, Lord, ge gaira kara patupatu.

⁵³Nau tu rutu papara vanira tana tangohahi, na pukuna tara mua pangotighi nimua na lei vetena.

⁵⁴Nimua na puku ni ghanaghana te vagha na lei linge lokana na vola ni volagu, lokana nigua na niulu ni vinano.

⁵⁵Tana lei bona ni bongi, Inau tu talu tatea ahei, Ighoe Lord, Mi nau tu taonighi nimua na lei vetena na pukuna eni.

⁵⁶Eni na halautuna na volagu, tu nia togotogo, ge ku pangotighi nimua na lei vetena.

⁵⁷Lord, Ighoe nigua! Inau tu baubahu ku pangotighi na lei bosamu!

⁵⁸Na tobagu udolu te liona nimua na vauto. Mo ko aroviu te vagha to nia baubahu.

⁵⁹Inau tu kene ghanaghanana na halautuna na volagu, mi nau tu ririu ge ku taonia nimua na lei vetena.

⁶⁰Inau tu lio mina, mua kiki na taoniani nimua na vetena.

⁶¹Na lei tinoni dika tara ghora hagheu ge ku kabalaghi, hauva, mi nau tu kau ngasi so ta nimua na lei vetena.

⁶²Tana bongi hau inau tu tapatughuru mu holoutogho nia nimua na vetena maemane.

⁶³Ahei tua ke nigho kikinima gaia keri na kulagu, maia ghua ahei ke pangotighi nimua na lei vetena.

⁶⁴Lord, na maramana udolu te vonughia nimua na dolo ke mua soko, ko taraiu mai nia nimua na lei puku ni ghanaghana.

⁶⁵Lord, e subo na totobo uto to gonighi vaniu te vagha to nia baubahu.

⁶⁶Inau tu taluutunighi nimua na vetena, mi taeni ko taraiu nia na dete maemane mana manaha.

⁶⁷Idania Inau tu tona hahi ritini na bona to va maemaneu, mi taeni inau tu taoni maemanea tua na bosamu.

⁶⁸Ighoe to uto mate to gehegehe uto, to taraiu nia nimua na lei puku ni ghanaghana.

⁶⁹Agaira ra talunagho tara huru kikou,, mi tana utuni nau tu pangotighi nimua na vetena tana tobagu.

⁷⁰Na tobadira te kutu vatu mara bule, ma nigua na togotogo te ghaha so ta nimua na vetena.

⁷¹Na vahaghitaili to nia vetena vaniu mai te uto, me tarai manahau ge ku kabu taonighi nimua na lei puku ni ghanaghana.

⁷²Nimua na vetena te mava vulea na mola ni gold, mana silver tagua!

⁷³Ighoe to goniu mo talu titinoniu, mo vaheu na manaha, ge ku taonighi nimua na vetena.

⁷⁴Agaira kara nigho kikinima itagua kara topoa na togotogo, na pukuna inau tu talua nigua na ghanaghana dilaa tana bosamu.

⁷⁵Lord, inau tu ghilala, nimua na lei dete tara maemane, me ulaghana ge ko dete maemaneu.

⁷⁶Lubatia nimua na dolo te mua soko ge ke patupatu inau. Te vagha to bahuu nia, nimua na tinoni ni lutu.

⁷⁷Lubatia vaniu mai nimua na dolo veiarovi ge ku vola, na pukuna nimua na vetena to nia togotogo.

⁷⁸Lubatira tara talunagho ge kara nira sika, na pukuna tara vuhavuhau, mi nau tu varava ngasi so ta nimua na lei vetena.

⁷⁹Lubatiu ge ku sakai sonikolu itadira, tara nigho kikinima, tara ghilalai nimua na lei vetena.

⁸⁰Kara bei huru kaleu gea na pangotiani nimua na vetena ge ku bei maa gea.

⁸¹Na lokagu te pitu dilaa nimua na maana ni vola, na pukuna tu ghanaghana dilaa na bosamu.

⁸²Na matagu tara arehia na righiana nimua na bosa ni baubahu ke mai utuni. ke ghua nigha ko togholuvu?

⁸³Inau tu pororodi vagha na madoke tana ahu ni lake, tu pitu lugu tua. Hauva Inau tu varava ngasi so ta nimua na vetena ge ku pangotighi.

⁸⁴Vei ke vagha na darona na bona ku pitu? ke ghua nigha ke vahaghitailira gaira tana kanahaghiniu?

⁸⁵Na vure talunagho raini tara nia sika nimua na vetena, tara gheli gilugu ge ku kutu haghe ilokana.

⁸⁶Nimua na lei vetena udolu tara utuni. Mara huru kikou, mi ghoe vamua ko hangau.

⁸⁷Gaira tara dutu ni mateagu, mi nau tu mua sanighi nimua na lei vetena.

⁸⁸Ta nimua na dolo te mua mautu, ko volau ge ku tangomana na taoniani nimua na vetena.

⁸⁹Lord, kasila, na bosamu ke kabu kasila kokou.

⁹⁰Nimua na kikinima ke horavia na lei vavata, ma nimua na talu puku te berea na maramana to gonia.

⁹¹Nimua na vetena itaeni te utuni, mana lei totobo soko tona kalea nimua arelavaghi.

⁹²Nigua na togotogo ke mua sabea nimua na vetena ke, nigua na dikalio vamua ke mateu.

⁹³Inau ku mua nighi ponolio nimua na lei vetena, na pukuna gaira ge u lavi olia na vola mana laga.

⁹⁴Inau nimua, ko volau! Inau heghegu tu kenea ge ku taonighi nimua na vetena.

⁹⁵Na lei tinoni dika tara polo inagho na matagu, mana bosamu vamua tu pangotighi.

⁹⁶Mana lei totobo maemane soko tara sosokogha, ma nimua na vetena tara mua sosokogha.

⁹⁷Inau tu dolovia nimua na vetena. Mu kene ghanaghana haia tughu bongi.

⁹⁸Nimua na vetena te va manahau, vulera na ghagua na levunimate, na pukuna nimua na vetena te huliu.

⁹⁹Eo, inau tu manaha vulera, gaira tara taraiu, na pukuna tu ghanaghana olighi haia nimua na bosa ni tarai.

¹⁰⁰Inau tu manaha vulera na lei tonikama. Mu pangotighi nimua na vetena.

¹⁰¹- Inau tu hove ge ku bei sakutua ge tana haba te dika, ge mu ku pangotighi vaso na bosamu.