Buka Linge 119:110-162

¹¹⁰Na lei tinoni dika tara talua vaniu na piti ge ku hogho ilokana tana halautu, mu ku mua ririu keha sania nimua na vetena.

¹¹¹Nimua na arelavaghi te nigua na puku ni nilau, te nighi puku ni togotogo na tobagu.

¹¹²Inau u kene ghanaghana ge ku pangotighi nimua na vetena, ritini tana sosoko ke va me va.

¹¹³Inau tu nira sika ahei tara mua kene ghanaghanamu ighoe, ma nigua na vilivili te maemane. Mi nau tu dolovighi nimua na lei vetena.

¹¹⁴Ighoe a nigua na vatei puipungisi mana tako ni rerebe, tana bosamu vamua ku varava ngasi.

¹¹⁵Kau tokeha itagua, ghau rana vure dika, ge inau ku righitaonighi na lei nina vetena nigua na God.

¹¹⁶Lord, ko patupatu mai te vagha to nia baubahu, ge ku vola! Ko bei lubatia nigua na ghanaghana dilaa ge ke paruruha.

¹¹⁷Ko sabe datou, ge ku vola, mu ku kene ghanaghana ni haia na lei nimua na vetena.

¹¹⁸Mi ghoe to nira murilio tara sanighi na lei nimua na vetena, na pukuna didira na pegopego.

¹¹⁹Na lei tinoni dika tana maramana eni tara vagha na vuvulogo tara kavulaha, hauva inau tu dolovia so na bosamu.

¹²⁰Inau tu nigho mataghu kikinima ngangata, mi nau tu mataghunighi nimua na lei dete.

¹²¹Ko bei lubatiu vanira ghagua na levunimate, na pukuna inau tu nia kaukauli na totobo te uto mete maemane.

¹²²Tu kurutigho ko nia baubahu vaniu na vauto, ko bei lubatira gaira tara talunagho kara dikalau.

¹²³Na matagu te mua righi kalea na utunina na rughu horuana nimua na baubahu ke mai utuni.

¹²⁴Inau nimua na tinoni lutu, ko maemane mai nia nimua na dolo te mua mautu, mo ko taraiu nia nimua na lei vetena.

¹²⁵Ko vaheu mai na manaha ni ghilala, nimua na tinoni ni lutu, ge ku ghilala manahani nimua na lei vetena.

¹²⁶Lord, te poso tua na bona ni lutu, mana lei tinoni dika tara hurakea nimua na vetena.

¹²⁷E utuni, inau tu dolovighi nimua na lei vetena, vulea na gold haba vaa na puku ni gold.

¹²⁸E utuni, na lei nimua na vetena soko tara maemane. Vagha keri, inau tu nighi sika na lei halautu te mua utuni.

¹²⁹Na lei bosamu tara rongoragha. Keri ge u taonighi.

¹³⁰Ra ia tarai na bosamu, me nia hevei na marara, mana ghilala vanira rana tovongo.

¹³¹Inau tu vukesi dilaa na mangagu, mu pitu dilai tua nimua na vetena.

¹³²Ko tatea vaniu mai nimua na veiarovi, te vagha to nea vanira ahei tara dolovia na ahamu.

¹³³Ko uhulighi nigua na sakutua nia na bosamu, ge ke bei laga vuleu gea na totobo te dika.

¹³⁴Ko volau tadira na lei tinoni dika, ge inau ku taonighi nimua na lei vetena.

¹³⁵Ko rei horu mai vuvungagu nia nimua na dolo, mo ko tarai manahau nia nimua na lei puku ni ghanaghana./vetena

¹³⁶Na kolobu ni daidari te Sali horu mai tana matagu, na pukuna na lei tinoni tara mua taonia nimua na vetena.

¹³⁷Lord, ighoe to maemane, ma nimua na lei dete te utuni.

¹³⁸Nimua na lei bosa ni vetena tara uto, te manana ge kai taluutunighi.

¹³⁹Inau te vonughiu na rutu papara, na pukuna na ghagua na levunimate tara mua taonia na bosamu.

¹⁴⁰Ra tabotaboi tua nimua na lei baubahu, vagha keri ge u dolovi ngangatai.

¹⁴¹Inau tu pile kikia ngangata me vesikagu, mu mua nighi ponolio nimua na lei vetena.

¹⁴²Nimua na maemane te kasila, ma nimua na vetena te utuni.

¹⁴³E mavatiu ngangatau na liogu, hauva ku topoa na togho lugu mi ta nimua na vetena vamua.

¹⁴⁴Nimua na lei dete te maemane haliu, ko hangau ge ku manahani ge ku vola.

¹⁴⁵Inau tu nia kokoeliulivuti na tobagu udolu, Lord, ko bosa tughu. Ge inau ku vatoghai nimua na lei vetena.

¹⁴⁶Inau tu tangi ngangaraha ge ko volau ge ku taonia nimua na vivili.

¹⁴⁷Inau tu rarai labota, naghona na sogha ni aho, mu tangi ngangaraha ge ko hangau, mi tana bosamu vamua ku talua nigua na ghanaghana dilaa.

¹⁴⁸Inau tu daidanihaghi, tu ghanaghana olighi nimua na baubahu.

¹⁴⁹Lord, ta nimua na dolo mana maemane tu varava, ko rongovighi nigua na ngangaraha, mo ko volau.

¹⁵⁰Na vure tara mua taotaoni tara dutu ni mai labuagu, na pukuna tara mua taoni vetena.

¹⁵¹Lord, Ighoe to mua kabu hau, mana nimua na lei vetena soko tara utuni.

¹⁵²Idania, tu ghilala te mua tughu nimua na lei ghanaghana.

¹⁵³Ko rei horu mai vuvungani nigua na dikalio, mo ko volau, inau tu mua nia ponolio nimua na lei vetena.

¹⁵⁴Ko niu pala ta nigua na livu, mo ko hughu tughu. Ko pilupungisia na volagu to nia baubahu.

¹⁵⁵Rana dika tara sagauvia na vavolamu, gaira tara mua talu koekoeni nimua na lei vetena.

¹⁵⁶Lord, E sule ngangata nimua na veiarovi, mana maemane ko hea oliu mai na volagu.

¹⁵⁷Subo tara gunaliu mara vaheu na vahola, hauva inau tu mua tabalili keha sagauvi nimua na vetena.

¹⁵⁸Inau tu nira sika gaira tara perou, na pukuna tara mua ghanaghana mavai na bosamu.

¹⁵⁹Lord, ko righia, u dolovi ngangata nimua na vetena ko vahe oliu mai na volagu, na pukuna nimua na dolo te mua mautu.

¹⁶⁰Na lei bosamu tara utuni, ma nimua na lei vetena maemane kara ghaha kasilai.

¹⁶¹Rana haba tara gunali tabou, mana bosamu te nia marate na tobagu.

¹⁶²Inau tu nia rivurivu na bosamu, te vagha siki sakai te sodoa na puku ni nilau.