Buk Song 143:5-9

⁵Nau mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.

⁶Mi save beten long yu na spirit bilong mi i laikim yu tru olsem nek bilong man i drai na em i laikim tumas long dring wara.

⁷Bikpela, yu ken harim prea bilong mi nau, long wanem, bilip bilong mi i bagarap. Yu no ken hait long mi, nogut mi dai na mi go long ples bilong ol man i dai pinis.

⁸Mi save bilip long yu, olsem na long moningtaim yu ken mekim mi i tingting gen long bikpela sori bilong yu. Mi save prea long yu tasol. Olsem na yu mas soim rot long mi na mi ken bihainim.

⁹Bikpela, mi go long yu bilong yu lukautim mi. Yu ken kisim bek mi long han bilong ol birua bilong mi.