1Eme no sambâŋkonec aŋelo moczi wahame honepo. E hârâcte ki â kâpâcwâru sâko moc bajuwec.
2Erâ e oâ, homa raŋɋa, demoŋ micne Sataŋ hâcne, e rorâ kâpâcwâruzi bândeŋnerâ jara 1 tauseŋ niŋgiŋhec foocte mucnerâ
3hârâcko tuŋkeme huwec. Hume motâcne kizi basanaŋkerâ sâfâzi bâbâzickewec. Eme ŋicne ŋicne maŋ bâsifuc mocwâc mi ejarehuc mâc fohame jara 1 tauseŋ taraocte mukicne. Tarame firuepie wefurâ dameŋ bembeŋne mac juocmu.
4Eme no eri ŋeŋe ŋerame honepo. Honehape ŋic fisirâ fainao ŋembiŋ jaŋe mumutara gie baniŋte mujarekicne. Eme Jesu mutaniŋkehuc Anuture dâŋ hâwicmâc bajuhapie upe‐jeŋic qâtâcnekicne jaŋere maŋ qâqâtâc honec‐jopapo, erâ qowi mimicne e jahacne â hawari‐ticne dieŋzi mi hecnembiŋ â ʒâŋe qâreŋ‐ticne mai‐jeŋicko â mejeŋicko mi bajumbiŋ, jaŋere maŋ qâqâtâc mâmâc honec‐jopapo. Eme ŋic i jaŋe sahac‐jeŋic ɋâreme honec‐jopapo. Eme jaŋe Kristohec ŋicwofuŋ gie bahapie jara 1 tauseŋ tarawec.
5Hâmokicne gâcne sâko jaŋe ine mi ɋârehuc jara 1 tauseŋ taraocte irec woŋec fombiŋ. Fafahare honepo i fafahare namba wâŋ.
6Fafahare namba wâŋko ʒuhuckeŋgopieŋ jaŋe ʒeri bubiaŋ faio tiri juŋgopieŋ. Ŋic iŋucne hâmoc namba tuzi bâsowariec‐jopaocmu. Jaŋe Anuture â Kristore taha bapafâc erâ juniŋmu, ehuc ehec ŋicwofuŋ gie bahuc juhapie jara 1 tauseŋ taraocmu.
7Eme jara 1 tauseŋ tarame Sataŋ firuepie kâpâcwâru fickonec mocwâc wefuocmu.
8Wefurâ ŋicne ŋicne mâreŋ ŋifec â ŋifec, faic â juwic juŋgopieŋ maŋjeŋic bâsifuckerâ Gogo â Magogo ŋic qafeŋ‐jopame râsi roroc erâ fisiniŋmu, jaŋe ʒare‐jeŋic hâwec moŋgeŋ iŋucne, wowosene tâmiric.
9Fisirâ mâreŋ wâneŋ sâko ira raferâ tiriŋic toma âterâ fohapie somâc‐jopambiŋ. Somâc‐jopahuc hae biaŋ i mâmâc orâŋkembiŋ. Iŋuc ehapie sambâŋkonec ʒoc waharâ ʒâhâmoc‐jopa‐fârewec.
10Â Sataŋ, maŋ bâsifuc ejarehuc juwec, e lambe opâre riqiczi ʒoc ʒahuc foekac ira behepie huwec. Qowi mimicne â porofete‐ticne burecne jahe ijaha mâmâc jupic. Eme jahe ira ŋafe ʒoaŋ qâqâtiri ʒâic fâro mana rahuc junicmu sanaŋ.
11Eme no eri ŋeŋe kâcɋene qaŋqaŋ moc honepo. Fainao ŋewec ere maionec sambâŋ â mâreŋ wise tâmirepic.
12Ehame hâmokicne fekicne wahakicne jaŋe mâmâc sasawa eri ŋeŋe fuŋnao domapie honec‐jopapo. Domahapie papiane papiane qaratiembiŋ. Erâ moc qaratiembiŋ i juju sanaŋte papia. Eme hâmokicne jaŋe juju bapa‐jeŋicte dâŋ papiao qâreŋkekicne i honehuc dâŋjeŋic mutarambiŋ.
13Eme dameŋ ira hâweczi maŋnao hâmokicne fombiŋ jaŋe bârisiec‐jopawec â hâmoczi ŋic hâmocne bârisiec‐jopawec â hârâczi ŋic hâmocne bârisiec‐jopawec wâc. Eme hâmokicne sasawa jaŋe juju bapa‐jeŋicte fuŋne rituhuc tofa bazu‐jarekicne.
14Eme hâmoc â hârâc i ʒocriqicko behepie huwec. Izi hâmoc namba tu ekac, ʒocriqic hâcne.
15Eme ŋic moc e ʒâŋene juju sanaŋte papiao basarâ ʒocriqicko behepie huwec.
