1Eme ufuŋmaŋkonec dâŋ wiwira sâko wahame manapo. I aŋelo 7 ʒiŋuc jazawec: “Ŋoŋe rarâ râqâc 7 hoŋkepie Anuture kimbeŋzi mâreŋko huzejec.”
2Eme aŋelo namba 1 eki rarâ râqâc‐ticnaonec wiac hoŋkeme mâreŋko huwec. Hume ŋic qowi mimicnere ʒâŋe qâreŋ bajumbiŋ â hawari‐ticne dieŋzi hecnembiŋ jaŋe wicʒâhâc ʒâic sisiac‐ticnehec mâretec fua‐jarewec.
3Eme aŋelo namba 2 eki râqâc‐ticnaonec wiac hâwecko hoŋkeme huwec. Hume hâweczi soc tânipu tinac ewec. Eme irec hâwecko qowi hâmo‐fârembiŋ.
4Eme aŋelo namba 3 eki râqâc‐ticnaonec wiac hoŋkeme opâo â riqicko hume soc efârewec.
5Eme aŋelo opâ soŋaŋ râekicne eki ʒiŋuc mume manapo: “Tiŋne â tiri, jumeŋzi juekic, okac babazuge bâbâsifuc tâmiric.
6Jaŋe mitiŋic â porofetefâcge jaŋere soc sipirickembiŋte soc jaha gumec‐jopatec nâŋgopieŋ. Eme i sâcke‐jarekac.”
7Eme alatazi dâŋ ʒiŋuc mume manapo: “Jâmbomac, Wofuŋ Anutu bapafâre, okac babazuge tiŋne â fâri fideteŋ.”
8Eme aŋelo namba 4 eki râqâc‐ticnaonec wiac hoŋkeme ʒoaŋko huwec. Ira hume ʒoaŋ ʒocne bâruŋke‐jâmbâŋkerâ ŋic mâretec ʒacjopawec.
9Eme ŋic jaŋe ʒoaŋ fâroroc‐ticnezi boc rikec‐jopame Anutu, micticnere wiac micne momori iŋuc fuawec, e ʒâŋe biŋe‐ticne musâqorembiŋ. Erâ maŋjeŋic sifu mi bârisierâ Anutu mi sâsembiŋ.
10Eme aŋelo namba 5 eki râqâc‐ticnaonec wiac qowi mimicnere ŋicwofuŋ ŋeŋeo hoŋkeme wahawec. Wahame hae mâreŋ‐ticne dapâc efârewec. Eme ŋic jaŋe ʒâic serereŋ manahuc nameŋ‐jeŋic kitâcnembiŋ.
11Eme ʒâic‐jeŋicte â wicʒâhâc‐jeŋicte Anutu sambâŋ rune musoriŋkembiŋ. Ehuc maŋjeŋic mi bârisierâ juju bapa‐jeŋic mi qikiŋnembiŋ.
12Eme aŋelo namba 6 eki râqâc‐ticnaonec wiac hoŋkeme Eufrata opâ sâkoo huwec. Hume opâ ʒickewec. I hata fuame ʒoaŋ wewefunaonec ŋicwofuŋ fisiniŋte iŋuc fuawec.
13Eme no honehape oâre mickonec â qowi mimicnere mickonec â porofete burecne ere mickonec demoŋ repicne jahec â moc qaqec hawari tinac wefumbiŋ.
14I jaŋe demoŋ fârine, mâsi wiac baniŋte tâpiri fojarekac. Jaŋe hâcne mâreŋ sâc irec ŋicwofuŋ qafeŋ‐jopapie Anutu bapafâre ere dameŋ sâkoo râsi roroc erâ fisirâ qaqac eniŋmu.
15“Manaŋgopieŋ, no ʒika qaqa jaŋe iŋucne ututuŋ fisipemu. Irec moc e biuctac jume mimi‐ticne fuazacte maŋɋâri juhuc ŋaqi‐ticne soŋaŋkezejec. Iŋuc eocmu ere manape ʒerine ekac.”
16Eme demoŋ jaŋe mâreŋ moc ʒâŋene Judadâŋko Hamagedoŋ mukicne, ira ŋicwofuŋ hetumaŋ‐jopa‐fârembiŋ.
17Eme aŋelo namba 7 eki râqâc‐ticnaonec wiac sawao hoŋkeme huwec. Eme ufuŋko eri ŋeŋe ŋeweckonec dâŋ wiwira moc ʒiŋuc wahawec: “Efârekicne.”
18Eme bâbâric â ɋuŋ parandaŋ â micfânâŋ fuawec â homeŋ kâcɋene sâko jâmbâŋ bawec, sâc iŋucne moc ŋic fuarâ juwarembiŋko mi bawec.
19Eme hae sâko fâuckeme jahec â moc ewec. Erâ mâreŋ sâc ŋic jaŋere hae tâtie‐fârewec, â Babe hae sâkore rufâc jaŋere Anutuzi iŋuc jaha manasurâ kimbeŋ‐ticnere waiŋ opâ gumec‐jopawec.
20Erâ wâc nuc â tiki mâmâc sirowe‐fârembiŋ.
21Â sambâŋkonec hoe sanaŋ hewec, hândâŋne buse iŋucne, izi ŋic hecjopame Anutu musoriŋkembiŋ. Hoe i hâhâwicne jâmbâŋ, ima‐ticnehec.
