1Eme aŋelo 7 râqâc 7 bajumbiŋ jaŋeraonec moczi norao warerâ ʒiŋuc nazawec: “Sasec ŋokac sâko opâ kâcɋenao ŋeekac e okacne fisicneocmu, i waretec gowatupe.
2Mâreŋne mâreŋne ŋic jaŋe ehec sasec eec eeŋgopieŋ â mâreŋ sâc ŋicwofuŋ jaŋe eraonec hâcne sasec‐ticnere waiŋ opâ nârâ maŋsifuc ejareekac.”
3Iŋuc nazame maŋnane ŋerisieme mâreŋ tuhuo jowacnu rawec. Eme ira ŋokac moc honepo, e qowi mimicne bâbâroŋ moc ere faio ŋewec. Qowi sahac‐ticnao ʒâŋe qâreŋ simbiŋne fuŋne fuŋne sâcke‐fârerâ fowec. Erâ qowi hâcne e qizec‐ticne 7 â ʒuŋene 10.
4Â ŋokac e ŋaqi bâbâroŋ â âmuc âmucne rojuwec, erâ erizi kiseŋ qâseŋ kiwec. Meticnezi râqâc moc golzi bakicne badomawec, i sasec‐ticnere sohoŋ mamakâczi fusewec.
5Mai‐ticnao ʒâŋesoŋ‐ticne kecʒiŋuc qâreŋkekicne fowec: “Babe hae sâko, mâreŋ sâc sasec mamakâc wiac irec neŋgocne no hâcne.”
6Eme ŋokac e tiriŋic â Jesure mumutaniŋfâc jaŋere soc nâku maŋne bibiriwame honepo. Honerâ bipic tatara enarewec.
7Eme aŋelozi ʒiŋuc muhuc wio‐narewec: “Wemocte bipic tatara egarekac? No ŋokacte fuŋne â qowizi âsickekac ere fuŋne â qowi qizecne 7 â ʒuŋene 10 irec fuŋne mâmâc gazape manac.
8Go qowi mimicne honemec i mârâc jaha juwec, ʒi mi jukac, ʒâhec ine hârâckonec risie wefurâ sisipiric sanaŋko huocmu. Eme qowi mârâc juwec, ʒi mi jukac, juku ine risieocmu, i mâreŋko ŋic jaŋe honerâ mu warec ecneniŋmu. Ʒâŋe‐jeŋic mâreŋ fufuaonecteaŋ juju sanaŋte papiao mi qâreŋkekicne, ŋic i jaŋe hâcne iŋuc eniŋmu.
9Ʒi maŋɋârâŋheczi mamanane fokac: Qizecne 7 i tiki 7, ŋokaczi ŋefackekac hâcne.
10Eme tiki 7 izi ŋicwofuŋ 7. Ŋicwofuŋ 5 arictac embiŋ, moc ʒi jukac â moc juku fuaocmu. Fuarâ dameŋ bembeŋne mac juocte mucnekicne.
11Qowi mârâc juwec, ʒi ine mi jukac, izi ŋicwofuŋ 7 jaŋere birio ʒuhuckehuc namba 8 eocmu, erâ sisipiricko huocmu.
12“Ʒuŋene 10 honemec i ŋicwofuŋ 10 jaha wâc, erâ jaŋe gie‐jeŋic dameŋ ʒiŋuczia mi fuŋkembiŋ. Ŋicwofuŋ gie‐jeŋic fuŋkerâ qowi mimicnehec dameŋ bembeŋne mac baniŋmu.
13Jaŋe maŋ mamanasu‐jeŋic mocjaha fome qowi mimicnere kiŋaŋ ʒoɋachec qaniŋmu.
14Ehuc Lamahec ʒika gie baniŋmu. Eme Lama eki ine sanaŋkerâ jopaocmu. Eki hâcne fekicne jaŋere Fekicne â ŋicwofuŋ jaŋere Wofuŋ Sâko. Â jume jujufâc‐ticne rowosâec‐joparâ rocjoparâ bufuŋfâc‐ticne bacjopakicne hâcne.”
15Iŋuc murâ ʒiŋuc ʒuhuckerâ nazawec: “Sasec ŋokac e opâ sâko irec mecnao ŋeme honemec, opâ izi ŋicne ŋicne, sahac hawari â dâŋmarac fuŋne fuŋnehec.
16Erâ ʒuŋene 10 honemec, jaŋe mecne â qowi e mâmâc qaisockerâ ŋaqi wiac jâoc rofârerâ biucne nârâ siec sahacne ʒocko rikeniŋmu.
17Erâ i mâc mi eniŋmu, Anutuzi maŋjeŋicko mu qafeŋ râeme jaŋe dâŋticne reŋkehuc maŋ mocjaha efârerâ qowi kiŋaŋ qacneniŋmu. Qacnehuc juhapie Anuture dâŋ hâcne sanaŋke‐fâreocmu.
18Erâ go ŋokac honemec i hae sâko, e hâcne mâreŋ sâc ŋicwofuŋ ejareme kiŋaŋ qacneniŋte tâpiri focnekac.”
