1“Sarde haeonec kikefuŋ aŋelo‐jeŋicte dâŋ kecʒiŋuc qâreŋkec: ‘Anuture mâro 7 â bâpiŋ 7 bajuekaczi gore ʒiŋuc mukac: No eebapagere fuŋne manakopac, ŋic jaŋe honecgupie ɋâricne jukomec tinac ekac, maŋge ine hâmoc qâŋɋâŋne fokac.
2Irec go ɋârerâ ŋic gâcne hâmozo eŋgopieŋ jaŋe maŋjeŋic âke ɋârezemec. Manakic, no Anuture maio eebapage honepe mi sâckekac.
3Go wiac gare tahac ekicne â gaza qazuc ekicne, i heɋârerâ aimuŋ bajuhuc maŋge bârisiezemec. Mi ɋâretecne ine râsi fifisi tinac fisi‐garepemu, go ʒâfo‐nane moc mi manahaŋtec biac fisipemu hâcne.
4Sarde haeo ira ŋicfâcge gâcne juŋgopieŋ, jaŋe ŋaqi‐jeŋic sohoŋ mi ruacnembiŋ. Eme iŋucnezi juku ŋaqi qaŋqaŋ rojuhuc nohec ŋeŋe juju eniŋmu. Jaŋe iŋuc eniŋte mana‐jarepe sâckekac.
5Moc e sasanaŋ gie baraku batarame ŋaqi qaŋqaŋ râcnepe rojuocmu, â ʒâŋe‐ticne juju sanaŋ papiao mi hetâmirepemu, aricne, no ʒâŋe‐ticne Mamac‐nanere maio â aŋelofâc‐ticne jaŋere maio mutaniŋkepemu.
6Mârozi kikefuŋ dâŋ jazakac, i hazecneheczi manazejec.’
7“Filadefia haeonec kikefuŋ aŋelo‐jeŋicte dâŋ kecʒiŋuc qâreŋkec: ‘Tiri juju â mume sasanaŋ, Dawidire ki bajuhuc motâc bâŋgoroŋkeme moczi mi basanaŋkeocmu, me basanaŋkeme moczi mi bâŋgoroŋkeocmu, eki hâcne gore ʒiŋuc mukac:
8No eebapagere fuŋne manakopac. Manakic, no maigao motâc moc baandaŋke‐garepo i moczi moc sâcne mi hebâzicke‐gareocmu. Go tâpiri piticne sawa fogarekac i manakopac, erâ sifu dâŋnane paŋnea bajuhuc ʒâŋe biŋe‐nane mi behemeŋ.
9Manakic, Sataŋte guruonec ŋic gâcne jaŋe Judaŋic fârine aricne, racne juhuc burec eeŋgopieŋ, eme no jaŋe ejarepe gorao fisirâ dieŋzi hegarehuc, âgo bacgupo i hone taranʒepieŋ.
10Go woŋec‐nane tatakic tâmiric jucmurâ mugarekicne, dâŋnane i paŋnea bajumeŋte noni eesâic dameŋ maicguzacte sabecgupemu. Eesâic i mâreŋ sâc ŋic jaŋerao mâmâc fua‐fâreocmu.
11No biac fâpemu, irec go wiac fogarekac i paŋnea bajuhaŋtec moczi eriduge mi gowac rozejec.
12Moc e sasanaŋ gie baraku batarame e Anutu‐nanere ufuŋko safatariŋ âkendâŋnepemu. Eme e ira domahuc juocmu sanaŋ. Erâ ere faio Anutu‐nanere ʒâŋe qâreŋkepemu, erâ Anutu‐nanere hae ere ʒâŋe iŋuc jaha ere faio qâreŋkepemu, i Jerusalem hae ɋâricne hâcne, sambâŋkonec Anutu‐naneraonec wahaocmu, erâ no nahacne ʒâŋe ɋâri i iŋuc jaha ere faio qâreŋkepemu.
13Mârozi kikefuŋ dâŋ jazakac, i hazecneheczi manazejec.’
14“Laodikea haeonec kikefuŋ aŋelo‐jeŋicte dâŋ kecʒiŋuc qâreŋkec: ‘Dâŋte mamacne â mumutaniŋ fârine â mume sasanaŋ, e Anuturaonec wiac fuawec irec fuŋqizecne juekaczi gore ʒiŋuc mukac:
15No eebapagere fuŋne manakopac. Go mâteŋne mi juekic â fârone mi juekic i manakopac. Mâteŋne me fârone juzo murâ junʒaŋ me!
16Mâteŋne â fârone ŋondeŋ‐jekicko dodo horaŋne juekicte micnaneonec maŋucgupe wahacmu.
17Go gahacnere ʒiŋuc muekomec, no mâriri bocjaha fonarekac, no wiac wemo afecne hurepo, irec wiac moc mi basapemu. Go fuŋnege kâuc baekic, ehuc qarâ suriŋne, huacbucne, tac qararacne, tiŋtuŋne â biuctac juekic, i mi mana tarakomec.
18Irec go gazape manac: Go noraonec ʒuŋe kizukicne furine barâ boreŋhec ezemec, â ŋaqi qaŋqaŋ furine barâ hetec hurâ mimige sâockezejec, erâ ʒâŋere wokemaŋ furine barâ ʒâŋege ruacnerâ fiɋaɋackezemec.
19No âgo bacjopaekopac jaŋe mu bâtiŋ â qa bâtiŋ ejare‐fâreekopac. Irec go ʒoɋac erâ maŋge bârisiezemec.
20Manakic, no motâc râpeo domahuc heickekopac, eme moc e dâŋnane manarâ motâc ronareme ere ficko ferâ suanʒeŋ nâ gumec ecnepemu.
21Moc e sasanaŋ gie baraku batarame noni hefârepe nore eri ŋeŋeo mâmâc ŋenacmu, no iŋuc jaha sasanaŋ gie baraku batarape Mamac‐nanezi ere eri ŋeŋeo ŋepemurâ hefârecnuwec.
22Mârozi kikefuŋ dâŋ jazakac, i hazecneheczi manazejec.’”
