Apostolo 25:10-24

¹⁰Pauloꞌa naenaeninaꞌa, “Eꞌe Roma azaḡa kotao edauꞌohe. Eꞌanoꞌo Roma azaḡa kotao kotahine manoḡa. Ḡaꞌe hubehune edeḡa, eꞌa Iuda azaḡa mazao haḡai sauꞌa mene haḡaidotaꞌaꞌe.

¹¹Eḡe haḡai sauꞌa uꞌano uḡuhiꞌuma roꞌidene, eꞌe rudanoga idaḡa. Rehano Iuda azaḡa ꞌadaꞌa rae fureneꞌeteꞌe ḡoeꞌaꞌe mene huga roꞌidene, vaze ꞌahoganiꞌa uḡuhoga veize zeḡe ꞌevorao riꞌihogaꞌe mene idaḡa. Eꞌe Roma zuhiꞌaḡaniꞌa kotahoga urateꞌohe.”

¹²Festo ani, aneꞌa dananeꞌeteꞌe azaḡa ḡadiziroteꞌe enogano, Paulo ꞌahige niro. “Ḡaꞌe Roma zuhiꞌaḡaniꞌa kotaꞌoga urateha. Eꞌanoꞌo ḡaꞌe Roma zuhiꞌaḡa vaḡe onamiꞌuma.”

¹³Mada nu enogano, Kini Agripa zu ezeḡa, niḡa Berenikeꞌa Kaisarea neḡa onairo, matuꞌu ḡoeꞌa Festo hanoga veize.

¹⁴Ze Festo teite mada ḡehaḡa radiunu ꞌahine, Festoꞌa Paulo hariḡa Agripa meꞌodo haro, raenaꞌa, “Felikiꞌa ꞌadama vaze ꞌahoga ḡuꞌano ohone modiro.” reiro.

¹⁵“Eḡeꞌa Ierusalema neḡa itirotene, dibuꞌo hauꞌeteꞌe boroboro zu Iuda azaḡa boroboroꞌa onaadu Paulo ꞌutiro, ebu eḡeꞌa kota ḡonaga ḡoeꞌa roꞌi rae umidiro, runeo tuḡunoga veize.

¹⁶Eꞌanoꞌo e ꞌahige rae ziro. 'Roma goroḡaꞌe ꞌahiguḡa. Kota zamaḡanoꞌe vaze ꞌahoga ꞌutine, vaze aꞌaꞌe ge ꞌuteꞌeteꞌe azaḡa zamao edanadu ane mone ḡoeꞌa rae fureniꞌuma. Eꞌe ḡaruganobuꞌu ḡonaga ḡoeꞌa rae furenadu, zeḡe ꞌevorao riꞌiniꞌuma.'

¹⁷Eꞌanoꞌo zeḡeꞌa eḡe teite Kaisarea neḡa ovairotene, madaḡa mene fanediro. Rehano irarirotene, e kota habaꞌano ehoriro. Ebu uti azaḡa zeadu eꞌe vazeḡa zamahu zouniro.

¹⁸Ane ꞌutiroteꞌe azaḡaniꞌa ḡoeꞌa rae furenirotene, eḡeꞌa zamariroteꞌe haḡaiḡa sauꞌa nuꞌe mene rae fureniro.

¹⁹Rehano zeꞌe, zeḡe Badiꞌa mazao fieꞌeteꞌe haḡaiḡa moneo, zu vaze ꞌahoga, niḡa Iesu, ani rudaro rehano ꞌize ḡaboga rae, Pauloꞌa raꞌeteꞌe hariḡa rae fureniro.

²⁰Eꞌe aḡuꞌa e nouge nouge ḡoeriꞌumaꞌe. Eꞌanoꞌo Paulo ḡadiniro, ani urateꞌe ga, Ierusalema neḡa itadu eꞌea kotanoga.

²¹Rehano Paulo uraꞌe Kaisarea neḡano radadu Roma zuhiꞌaḡaniꞌa kotanoga uratiro. Eꞌanoꞌo uti azaḡa zinaꞌa, 'Pauloꞌe ḡuꞌano ohone radoꞌi! Onamoo madaḡa meine, Roma zuhiꞌaḡa mazao tuḡuniꞌuma' reiro.”

²²Ebu Agripaꞌa Festo ninaꞌa, “Eḡe ḡatana zuni ane ḡoere igihi.” reirotene, Festoꞌa ninaꞌa, “Ḡa ohoḡoruꞌu igiꞌuma.” reiro.

²³Irarirotene, Agripa ani Berenike-ne, dabua manoḡa rohorohoḡeita haḡaadu, nuꞌonuꞌo neḡa diuḡiro. Ebu uti azaḡa boroboro zu Kaisarea neḡa azaḡa boroboro zuni diuḡiro. Ebu Festoꞌa uti azaḡa zeadu Paulo zamahu zouniro.

²⁴Ebu Festoꞌa raenaꞌa, “Kini Agripa zu ꞌahi onaateꞌe azaḡa niduꞌa, vazeḡa ꞌadiꞌeꞌe. Ierusalema neḡano zu Kaisarea neḡano Iuda azaḡaniꞌa raenaꞌa, 'Ḡabode radoga mene idaḡa.' rae tatareꞌeteꞌe vazeḡa.