Aposel 25:10-24

¹⁰Ra o Pol i balu i lena, “Uniri a tur una warkurai anun a Sisa, i tokodos ut sur din warkurai iau nin. Ka pam tu niraro torom a taro Juda, ui kai u sa tasman tari.

¹¹Ra a sa pam tar a sakino ra i tokodos sur an iru uni, i wakak kut sur an iru. Ikut ra a kum utna ri det takun iau nami ke lingmulus, ke tokodos sur din pitar tar iau tandet. A sasaring sur a Sisa ut in longoro a warkurai anung.”

¹²Ra o Pestus i sa wasiso pas nam anun a kum tene mananos, i inanos o Pol lena, “Uniri u sasaring sur un nan torom a Sisa, ra an tulu ru ui utong o Rom torom a Sisa.”

¹³Ra i sa rop a kabano bung, a King Agripa der nama bunu ano, o Benaisi, der wanpat tong o Sisaria, ra der wasiso na ugasgas pas o Pestus una nun a kinkinis na mugumugu.

¹⁴Ra der kis a susut na bung tiro iai, o Pestus i inanos a king nama wasiso un o Pol lena, “O Peliks i sa mana gusun anun a pinapam, ikut i madek tar ara musano una karabus, ra kuri utmakai i una karabus.

¹⁵Ra a kis sapat o Jerusalem, a kum lamlabino tene etabor torom o God ma a kum mugumugu anun a taro Juda det inanos iau nama kum etakun uni, ra det saring iau sur an warkurai i sur din um doko i.

¹⁶A inanos det lena, ‘Awu sur a ngasino anun a taro Rom, sur din pitar tar tu musano sur din warkurai i sur in mat, ra kabaut i tur tomo nam det ra det takuni, sur in wasiso bati ut gusun a kum etakun.’

¹⁷“Ra det wanpat tomo nin, ka balbalon nama warkurai. Ara bung kut numur, a kis una kiskis na warkurai, ra a itula sur din ben pas a musano ra.

¹⁸A taro na etakun det tur sur det in wasiso, ikut awu sur det takuni nam tu sakino utna, elar nama sau ra a nuki.

¹⁹Det takuni kut una kum utna tagun anundet a ngas na lotu, ma una ara musano, a risano o Iesu ra i mat, ra o Pol i watungi lena i sa laun melet.

²⁰Ka talapor ma ka tasmani ra an iting pepetlai una kum utna ri. Ra a tingi sur in nan usapat o Jerusalem ma din warkurai i una kum etakun ra, sapat.

²¹Ikut, o Pol i sasaring sur a Sisa in warkurai i, ra a itula sur in kis munung nin una karabus, tuk una bung ra an tulu ru i utong o Rom torom a Sisa.”

²²Ma o Agripa i watungi tan o Pestus lena, “Iau kai, a nem na longoro a musano ri.” Ra o Pestus i watungi lena, “Markan un longoro i.”

²³Una bung numur, o Agripa ma o Benaisi der wanpat. Di mar der nama ngas na ememar anun a kum lamlabino. Det ruk tomo nama kum mugumugu anun a taro na inaim, ma a kum mugumugu tagun a tamon ra. Numur o Pestus i itula sur o Pol, ma di ben pasi.

²⁴Ma o Pestus i watungi lena, “King Agripa, ma mot kai a taro ra dat kis tomo nin, mot tama a musano ri. A taro Juda rop tagisapat o Jerusalem ma nin kai det saring iau sur an warkurai i, ra det kukukuk lena ka det nemi sur in laun melet mo.