1Paulo ani Banabasine Ikonio neḡano onamirotene, iḡaiḡa haḡaeꞌeteꞌe teige Iuda azaḡa kuru neḡano diuḡiro, ebu eꞌea faifairu haramadu, Iuda azaḡa zu Giriki azaḡa ḡehaḡa bagaḡaniꞌa Iesu mazao fiiro.
2Rehano Iuda azaḡa, Iesu mazao mene fiiroteꞌeꞌa, Iuda mene azaḡa zama ḡunuḡununiro. Ebu Paulo duḡuru agirezouga veize Iuda mene azaḡa zama aro.
3Paulo zu Banabasiꞌe eꞌea faḡa hune radadu, Zuhiꞌa Boro veize inare haramiro. Ebu Zuhiꞌa Boroꞌa ḡahunofiꞌuma hariḡaꞌe ḡoeꞌa huga reifine, Zuhiꞌa Boroꞌa apostolo azaḡa ꞌevore hina ane tahi gigiꞌa haḡaiḡa zu zaguzagaꞌuma haḡaiḡa haḡao ziniro.
4Rehano eꞌe neḡa azaḡaniꞌe rovotadu, nuꞌe Iuda azaḡa mone reiro, u nuꞌe apostolo azaḡa mone reiro.
5Ebu Iuda mene azaḡa nu zu Iuda azaḡa nuꞌa zeḡe ne ibito ziniꞌeteꞌe azaḡa teite tiburanadu, hadi hina apostolo azaḡa zimi sausauzoga veize, neneḡaniro.
6Rehano Paulo zu Banabasiꞌe eꞌe hariḡa igirotene, eꞌe neḡa modadu Lukaonia habaꞌa ferau onamiro. Ebu Lusitera zu Derebe neḡano zu eꞌe uhiḡa uhiḡa habaꞌano
7hari manoḡa harame onaminu.
8U Lusitera neḡano odaḡa sauꞌa vazeḡa ꞌahoganiꞌa ehore radiunu. Aniꞌe ꞌouge fureniro, ebu mene hune zu edau onaminu.
9Ani Pauloꞌa haramiroteꞌe igi radiro. Ebu Pauloꞌa ḡiane runirotene, ani Badiꞌa mazao fieꞌe ꞌahine, Badiꞌaꞌa odaḡa fainiꞌuma rae zamariro.
10Ebu Pauloꞌa ḡihau ḡoreneꞌenaꞌa, “Iḡune edanoꞌi!” rae niro. Ebu ani zogone rafate iḡunadu edau ragaviro.
11Ebu vaze ḡuḡuvaḡaniꞌa, Pauloꞌa haḡairoteꞌe haḡaiḡa horonirotene, ze Lukaonia ḡoeꞌano huaro, raenaꞌa, “Badiꞌaꞌa vaze radu emeḡe vaḡe ovaeha.”
12Ebu Banabasiꞌe Dio reiro, u Pauloꞌe Hereme reiro, mazaḡa Paulo ani iḡaiḡa haramido ꞌahine.
13Dio dibuꞌo neḡaꞌe Lusitera neḡa enogano. Eꞌea dibuꞌo hauꞌeteꞌe vazeḡaniꞌa, vaze ḡuḡuvaḡa teite boromakau nu zu ḡeḡene haḡairoteꞌe kakaḡa Lusitera neḡa ibihetaḡa odohe onairo. Ebu apostolo azaḡa dibuꞌo zinihi reiro.
14Rehano Banabasi ani Paulone, ne azaḡaniꞌa nagini haḡaihi raꞌeteꞌe igirotene, mene haḡaiꞌuma haḡaiḡa radu zamaze adudanadu, dabuaze zigiro. Ebu vaze ḡuḡuvaḡa ḡunuḡano dure diuḡeꞌenaꞌa, huau ḡoeriro, raenaꞌa,
15“Nego nabudi, za nougadu ꞌuguḡa haḡaiḡa haḡaeꞌohe? Emeḡe zuni vaze tauḡi, zae teite idaḡa. Eme zae mazao hari manoḡa haramifine onaeha, zaeꞌa huga oꞌoꞌa haḡaiḡa eꞌe modadu, hubehune radiuꞌeteꞌe Badiꞌaḡa vaḡe onaifine. Aniꞌe adure, raha zu davara haḡairo, ebu eꞌea radiuꞌeteꞌe ḡauḡa niduꞌa haḡairo.
16Amahi madaḡano bone, habaꞌa habaꞌa azaḡa niduꞌa zeḡe zeḡe edeḡa haḡaiḡa haḡainutene, Badiꞌaꞌa ḡiaze modinu.
17Rehano vazeꞌa Badiꞌa zamarifine aneꞌa haḡai manoḡa manoḡa fureninu. Zae veize adureonoꞌo irugu tuḡuninu, ogomu madaḡa madaḡa fureninu, ebu ogomu boro zininu, zu matuꞌu hina zamaze iriꞌavoninu.”
18Ze ꞌouge reiro rehano, ne eꞌe azaḡaꞌe boromakau manadu, ḡahuno zinihi radu teꞌoteꞌaro. Rehano ḡonagano eꞌe haḡaiḡa ꞌuoga idararo.
19Eꞌe ḡarugano Iuda azaḡa nuꞌa Antioka zu Ikonio neḡanonoꞌo onaadu, eꞌe neḡa azaḡa zama aro. Eꞌanoꞌo zeꞌe Paulo hadi hina maro, ebu ze ꞌane ani rudaneha radu, ne enogano ahase buniro.
20Rehano Zuhiꞌa Boro tahiꞌa tahiꞌaꞌa gabaḡeḡene edauꞌenogano, ani iḡunadu, eꞌe neḡa bare diuḡiro. Irarirotene, Paulo ani Banabasi teite Derebe neḡa onamiro.
21Paulo ani Banabasine Derebe neḡano hari manoḡa haramiro, ebu Zuhiꞌa Boro tahiꞌa tahiꞌaꞌa eꞌe neḡano ḡehararo. Eꞌe enogano ze Lusitera, Ikonio neḡa zu Pisidia habaꞌa Antioka neḡa bare onamiro.
22Ze eꞌea Zuhiꞌa Boro tahiꞌa tahiꞌa inara ziniro, ebu “Iesu mazao fie gigaranoꞌi!” rae inaraziro. Ebu ꞌahige reiro. “Eme aduga ḡehaḡa hidiꞌuduꞌu, Badiꞌaꞌa zuhiꞌafiꞌeteꞌe zamaḡa diuḡiꞌuma.”
23Paulo ani Banabasine, neḡaneḡa ekalesiaḡano Iesu mazao fieꞌeteꞌe azaḡa ibito zenoga veize vaze nu ohoziro. Ebu ogomu moneo zaḡozaḡeꞌenaꞌa zeḡe veize kuraro. Ebu zeḡeꞌa fieꞌeteꞌe Zuhiꞌaḡa Boro ꞌevorao tiro.
24Ebu Pisidia habaꞌa vitau onamadu Pamufulia habaꞌa bare onamiro.
25Ebu Perega neḡano Badiꞌa ḡoere haramirotene, Atalia neḡa ovoiro.
26Ebu Atalia neḡanonoꞌo ḡasi hina bare ruhau onamo, Suria habaꞌa Antioka neḡano feuriro. U zeḡe ragavo, hari manoḡa harameꞌetaꞌaꞌe Antioka neḡanonoꞌo ḡadaheniro. Antioka ekalesia azaḡaꞌe, tuḡuziroteꞌe zamaḡano, Badiꞌa ḡahunone manoḡaniꞌa Paulo zu Banabasi rana rouga radu, Badiꞌa ꞌevorao teadu tuḡuziro. Ebu anianine eꞌe gauḡa haḡae hauḡadu iziduꞌu ꞌada bareꞌeteꞌe.
27Zeḡeꞌa Antioka neḡano feurirotene, ekalesia azaḡa nuꞌoziro. Ebu Badiꞌaꞌa zeḡe gauonoꞌo haḡaidoteꞌe niduꞌa rae fureniro, ebu Iuda mene azaḡa zuni Iesu mazao fiiꞌuma ibiḡa Badiꞌaꞌa bohaniroteꞌe hariḡa meꞌodo ziniro.
28Ebu ze, Zuhiꞌa Boro tahiꞌa tahiꞌa teite mada ḡehaḡa eꞌea radiunu.
