HECHOS 25:10-24

¹⁰Pab mcàb. Ndxab Pab loo Fest: ―Chele'i tatua' nac, más huen gan loo gobiern co' ndub ñibe' ciuda Rom. Tya, más huen ndxàal tyub rez cón chenen com le' lùu nda'que' cuent no nonque'l tarte lin nec thìb con' ye'rsin' loo mèn co' nac mèn nación Israel ne' ne' tar guthen nec thìb mèn.

¹¹Chele' daa ngcuan thìb xquin daa co' ndli par ndxàalque' gath daa, ingue cà di'sten lool par gath daa. No yende chó mport nzo lezon par gath daa. Per chele' mèna ingue go xo'fte con' co' nac lìcpe' con' ye'rsin' co' ngue lin lool, yende chó derech ndxàp nec thìb mèn no yende chó cón che'n mèn par ta'xù' mèn daa loo mèn nación Israel co' nzo ciuda Jerusalén. Cona, ña'ben di's lool, Fest, más huen tel' lùu daa loo gobiern co' ndub ciuda Rom par tub rez yub gobiern cón chenen.

¹²Per co'se' ngolo mdoodi's no Fest mèn co' thidte ñibe' con Fest, ndxab Fest loo Pab: ―Lùu mna'b di's loon más huen tub rez gobiern co' ndub ciuda Rom cón che'nl. Pues, yal loo gobiern tya, xàa. Ngolo cuent.

¹³Ndxàc plá huiz tataa ndxab Fest loo Pab, ngua rey Agrip con Bernis co' nac sa'l Agrip par ciuda Cesar par ngua nii Agrip Diox loo Fest liz Fest.

¹⁴Láth ngo Agrip plá huiz le'n ciuda Cesar, mda' Fest cuent loo rey Agrip cón che'n Pab. Ndxab Fest loo rey Agrip: ―¿Xá neel, cara? Trè' nzo thìb mbi' co' taate mtan' Fels. Ne'ntelode ndub rez Fels cón che'n mbi'. Mtan' Fels mbi' loo solndad xal thìb pres.

¹⁵No co'se' ngon plá huiz ciuda Jerusalén pezea, rye jef co' más ñibe' loo rye nguley', no mèngool co' ñibe', no co' ndyoo naa, no co' ndyoo ner loo mèn nación Israel mqueltàa loon. Mda' mèna part loon le' daa li justis cón che'n mbi'. Mna'b mèna di's loon quexù'en que' falsen mbi'.

¹⁶Per daa mcàb loo mèna le' ley che'n gobiern ciuda Rom inda'de lugar par guthxù' mèn nec thìb mèn chele' cón che'n mèn tarte tyub rez loo thìb no loo tedib mèn par càb mèn no par tub mèn razon loo mèn co' ngue quexù' ngue que' fals mèna.

¹⁷Cona, co'se' mbi'th rye mèna loon trè', luega tedib huiza ngòon oficin daa par mduben co'te' ñibe'en. Mblin mandad ngua xi solndad mbi' par ndye'th mbi' loon.

¹⁸Per rye mèn co' ngo loon par quexù' que' fals mèn mbi' loon, ne'ngol'te mèna arid di's loon xal mblin xtùuz li mèn par tub rezen cón che'n mbi'.

¹⁹Angoluxte nac di's co' nda' mèna cuent loon cón che'n mbi' le' con' co' mbli mbi' nac cón che'n xley' mèn nación Israel. No naca cón che'n thìb mbi' co' lèe Jesús co' nguth. No nde'th mbi' loo mèn le' mbi' co' lèe Jesús nabanque'.

²⁰Per com le' daa ne'neede cón lin con mbi' co' nac cón che'n mbi' co' lèe Pab, ¿lé'?, mnibdizen loo mbi' ché' ndlya's mbi' ya mbi' ciuda Jerusalén par tyub rez cón che'n co' ndxàc loo mbi' ciuda Jerusalén.

²¹Per ale ndxe'leque', mcàb mbi' loon más huen ya mbi' loo rey Agust co' nac gobiern co' ndub ciuda Rom. Sya, mnibe'en loo solndad tolo quenap solndad Pab le'n cuartel xal pres axta ta'i lugar loon par tel'en Pab loo rey Agust xal ndlya's Pab.

²²Sya, ndxab rey Agrip loo Fest: ―Daa, ne, ndlyaz gòn cón che'n mbi', cara, ñeene' xal nac cuent co' ta' mbi' loon. Sya, mcàb Fest. Ndxab Fest loo rey Agrip: ―Neeca. Chele' lùu ndlya's gòn cón che'n mbi', lueg yé' lin mandad ryo' mbi' cuartel. No gaben loo mbi' ta' mbi' cuent lool. ―Neeca, ndxab rey Agrip.

²³Co'se' ngo nìi izlyo' tedib huiz co' nde nquea, no co'se' mzin rey Agrip ryop Bernis co' nac sa'l rey, anze'f ndye's rey Agrip con Bernis mzin xa' no ngòo xa' le'n sal liz Fest con mèn co' nac general no con mèn roo no mèn xèn che'n ciuda Cesar. Le Fest na, mtel' solndad par ngua xi solndad Pab.

²⁴Sya, ndxab Fest loo rey Agrip: ―Tad rey Agrip, no rye gu' mèn ciuda Cesar co' nziri' trè' con nu', trè' lu'en mbi' ndxè' loo gu'. Cón che'n mbi' ndxè' nac co' mdan cuent loo gu' pezea le' huax mèn nación Israel mda' cuent contra mbi' ndxè' loon. Le'le' mda' mèn nación Israel co' nzo ban le'n ciuda Jerusalén cuent loon. No le'le' mda' mèn nación Israel co' nzo ban ciuda Cesar ndxè' cuent loon, ne. No imbe see teede lezo' mèn. Mbez mèn loon ndxàalque' gath mbi'.