Aposol nup meme 25:10-24

¹⁰Qesim waŋgiyökmö, Polnöŋ jiyök, “Rom sisa kiŋnöŋ jim kutuiga keu jake ki kuŋgugera ki kinbiga kewöt niŋgiba keuni jim tekönöŋga dop kölma. Ni Juda ambazip yeŋgöra bölöŋi kun qahö ahal. Mia nangak ölöp möt yaközan. Mönö Wuanöŋgöra kunbuk yeŋgöreŋ anbileŋak?

¹¹Bölöŋi kun qahö ahalmö, Köna keu kun qösököba yuai kun ak böliba miaŋgöra kömupkö buŋaya akileŋak ewö, ‘Nöŋön kömumbileŋbuk,’ jiba qahö ölöŋ köla anmam. Mi qahöpmö, yeŋön kazik keu öne töhöntöhön jiba keuŋinaŋgö könaŋi kondelbingö osize ewö, keu omaŋaŋgöra aka kunŋan nömimba yeŋgö böröŋine almapkö osima. Rom sisa kiŋnöŋ mönö keuni mindiŋgöba jim teköi diŋgima. Miaŋgöra nöŋön mönö yaŋgö jeŋe anmamgö köhöiba qesizal.”

¹²Mewö jiiga Festusnöŋ jembonurupŋi yembuk qambaŋ keu jaruba kewöta kewö meleŋ waŋgiyök, “Gi sisa kiŋgöreŋ anmamgö möta qesizani, miaŋgöra mönö ölöp Rom anda yaŋgö jeŋe kinman.” Mewö.

¹³Wehön tosatŋi teköiga kiŋ Agripa aka nenŋi Bernaisi yetkön Festus eka gödaŋiri kondelbitköra Sisaria taonöŋ kayohot.

¹⁴Kaba miaŋgöreŋ wehön gwötpuk malohotka Festusnöŋ Polgöreŋ keu mi kiŋbuk eraum möta kewö jiyök, “Filiksnöŋ azi kun qahö pösari kösö mire kiaŋgöreŋ tata malja.

¹⁵Nöŋön Jerusalem anbiga Juda yeŋgö jike nup galöm bohonŋini aka jitŋememeurupŋinan nöŋgöreŋ kaŋgota kewö qesim niŋgiget, ‘Nini azi miaŋgö keu memba kainga göŋön mönö ölöp yaŋgö könaŋi kewöta keuŋi jim teköman.’

¹⁶“Mewö qesim niŋgigetmö, nöŋön yeŋgöra kewö jibiga mötket, ‘Rom gawman neŋgöreŋ köna mi kewö: Kungö sileŋe keu bölöŋi ala jizei, nini ambazip kun yaŋgö keuŋi mi laŋ kude jim tekömakzin. Mutuk öröba keu jakeŋe alin kazikurupŋan kagetka likeplikep öröröŋ aröŋda kingetka keu sileŋe ala jim waŋgigetka likepŋi ölöp jima. Keu likepŋi jiiga mi kewöta ölŋi ahuiga miaŋgö dop ölöp keuŋi jim tekömakzin.’

¹⁷Yeŋön ki kaba tokogetka nöŋön nalö qahö köriiga ahöba wahöta miaŋgöreŋök jimtekötekögö dum tatatŋe tata jim kutubiga azi mi waŋgita kagetka nöŋgö jene kaŋgorök.

¹⁸“Kaŋgorökmö, keu memba kageri, yeŋön liliköm waŋgiba aröŋda kinda keu sileŋe ala jim waŋgiget. Mewö aketka yuai bölöŋi kötökŋi kun akawak, mewö jimegöra mamböralmö, keu mewöŋi kun qahö jiget möral.

¹⁹Mi qahö jiget möralmö, salupŋe azi mi qetala nanŋini mötnaripŋinaŋgö keu kembaŋi tosatŋi aka azi kun qetŋi Jisös yaŋgöra aŋgururuk aket. ‘Jisösnöŋ kömuyök,’ jigetmö, Polnöŋ ‘Guliba malja,’ jiba kapaŋ köla köhöiyök.

²⁰Mewö jiba kazik algetka nöŋön ‘Keu mewöŋi mi denöwö kewötpileŋak?’ jiba köna jaruba uruyahöt möral. Mi möta kinda kewö qesim waŋgial, ‘Silenöŋ alal keu jizei, gi ölöp miaŋgö likepŋi mi Jerusalem öŋgöba miaŋgöreŋ jibanak me qahö?’

²¹Qesim waŋgialmö, Polnöŋ Öŋgöŋgöŋamninaŋgö jeŋe anmamgö kapaŋ köla kewö qesiyök, ‘Mönö jinöŋga galöm köl niŋgigetka sisa kiŋgöreŋ anbiga keuni mindiŋgöiga diŋgima.’ Mewö qesiiga wahip azi jim kutum eŋgibiga galöm kölgetka tatza. Biaŋ melaim waŋgibiga sisa kiŋgö jemesoholŋe anma.”

²²Festusnöŋ mewö jiiga Agripanöŋ jii mörök, “Nia kun azi miaŋön keuŋi jii mötmamgö sihimŋi mötzal.” Jiiga meleŋnök, “Urangun ölöp keuŋi mötman.”

²³Mewö jiiga ahöba wahötketka kantrigö jembon, suahö galöm ketaŋi aka jitŋememe öŋgöŋgöŋi yeŋön kaba Agripa aka Bernaisi yetköra jura sorom jölŋire uta sösöŋgai liŋet köla köl öröm etkigetka keugö jake miri öŋgöŋgöŋi miaŋgö uruŋe aŋgotket. Festusnöŋ jim kutuiga Pol waŋgitketka miaŋgöreŋ kaŋgorök.

²⁴Polnöŋ kaŋgoriga Festusnöŋ wahöta kinda kewö jiyök, “Kiŋ Agripa aka azi ketaŋi pakpak nembuk ki tatzei, iŋini mönö azi ki eket. Juda ambazip kambu pakpak yeŋön yaŋgöra aka uruni kuŋguget. Sisaria taon kiaŋgöreŋ aka Jerusalem siti miaŋgöreŋ ölŋa keunöŋ kuŋgum niŋgiba qet gigilahöba kewö jiba malget, ‘Azi kiaŋön gölmenöŋ malmawaŋgö dop qahö. Mönö yapmakek!’