Hechos 25:10-24

¹⁰Bubiꞌë didzaꞌ Pablo, gudxëꞌ lëꞌ: ―Zoaczaꞌ ga röꞌ nu rbequi xbey uláz queëꞌ César, ga naꞌ ral‑laꞌ cuequi xbeynëꞌ nedaꞌ. Cutu bi huiaꞌdöꞌ nunaꞌ quequëꞌ bönniꞌ judío, atiꞌ chnözcznuꞌ lë ni.

¹¹Laꞌnaruꞌ nunaꞌ tu le cunác, o bítiꞌtëz le run ga gbagaꞌa zxguiaꞌ gatiaꞌ, cutu táꞌbagaꞌa gatiaꞌ. Naꞌa, chquiꞌ cutu nunaꞌ ca naꞌ taꞌnë́ꞌ quiaꞌ bönniꞌ ni, nutu nu dë lu nëꞌi udö́d nedaꞌ lu naꞌquëꞌ. Rnabaꞌ tsijaꞌ lahuëꞌ César ga cuequi xbeynëꞌ nedaꞌ.

¹²Catiꞌ chbë́ꞌlenëꞌ yuguꞌ bönniꞌ yúlahuiꞌ didzaꞌ Festo, bubiꞌë didzaꞌ, gudxëꞌ Pablo: ―Chgnabuꞌ tsijuꞌ lahuëꞌ César. Lahuëꞌ César uyijuꞌ.

¹³Gdöd chop tsonn dza, bdxinëꞌ Cesarea Agripa, bönniꞌ rna bëꞌë, dzagnu lëꞌ Berenice, duyuquëꞌ Festo.

¹⁴Catiꞌ chgulacuꞌë niꞌ zian dza, Festo gdíxjöiꞌnëꞌ Agripa, bönniꞌ rna bëꞌë, ca nac queëꞌ Pablo. Gudxëꞌ lëꞌ: ―Zoëꞌ ni bönniꞌ bucaꞌnëꞌ lëꞌ lidx guia Félix.

¹⁵Catiꞌ gzoaꞌ Jerusalén, guladxinëꞌ lahuaꞌ yuguꞌ bxuz uná bëꞌ len bönniꞌ gul tuꞌzejniꞌi, atiꞌ gulanë́ꞌ queëꞌ bönniꞌ ni. Gulanabnëꞌ nedaꞌ gchugaꞌ queëꞌ gatiëꞌ.

¹⁶Nedaꞌ bubiꞌa didzaꞌ, gudxaꞌ lequëꞌ cutu nalëbcnëꞌ bönniꞌ Roma laꞌchuguëꞌ queëꞌ bönniꞌ gatiëꞌ chquiꞌ cutu laꞌdxini lahuëꞌ nup tuꞌquí lëꞌ, quië gac ubiꞌë didzaꞌ ca nac lë naꞌ taꞌnë́ꞌ queëꞌ.

¹⁷Qui lë ni naꞌ, catiꞌ guladxinëꞌ lequëꞌ ni, cutu caꞌ gdzeydaꞌ, san catiꞌ gzaꞌ gyeníꞌ yetú dza gröꞌa ga rbequi xbeydaꞌ, atiꞌ gna béꞌidaꞌ nup yajxiꞌgac bönniꞌ ni.

¹⁸Catiꞌ gulacuꞌë ni bönniꞌ naꞌ tuꞌquíëꞌ lëꞌ, cutu bi gulanë́ꞌ queëꞌ ca busacaꞌ quiaꞌ laꞌnë́ꞌ.

¹⁹Gulanë́ꞌ queëꞌ laꞌgac didzaꞌ bizxj ca nac le taꞌyejlëꞌë Dios, len ca nac queëꞌ bönniꞌ lëꞌ Jesús, nu naꞌ gut, san Pablo runëꞌ tsutsu xtidzëꞌë rnëꞌ ni zoëꞌ nabanëꞌ leyúbl.

²⁰Le buchíxidaꞌ ca nacgac lë ni, gnabdaꞌ‑nëꞌ Pablo chquiꞌ rëꞌnnëꞌ tsijëꞌ Jerusalén, atiꞌ niꞌ soa nu cuequi xbey lëꞌ ca nacgac lë ni.

²¹Niꞌr catiꞌ gnabëꞌ Pablo tsijëꞌ lahuëꞌ Augusto César quië cuequi xbeynëꞌ lëꞌ niꞌ, gna béꞌidaꞌ bönniꞌ rjaquëꞌ gdil‑l lun chíꞌigarëꞌ lëꞌ catiꞌ gal‑laꞌr dza gsölaꞌa‑nëꞌ lahuëꞌ César.

²²Niꞌr Agripa gudxëꞌ Festo naꞌ: ―Lëzcaꞌ nedaꞌ rëꞌndaꞌ yöndaꞌ le gnëꞌ bönniꞌ naꞌ. Festo gudxëꞌ lëꞌ: ―Cxö yönnuꞌ le gnëꞌ.

²³Catiꞌ zaꞌ reníꞌ yetú dza, len ba zxön guladxinëꞌ niꞌ Agripa len Berenice. Gulayaziëꞌ ga ral‑laꞌ luꞌë didzaꞌ, dzagquëꞌ lequëꞌ bönniꞌ uná bëꞌ, atiꞌ gulasölëꞌë nup tsajxiꞌgac Pablo.

²⁴Niꞌr Festo gudxëꞌ Agripa, bönniꞌ rna bëꞌë: ―Bönniꞌ uná bëꞌ, Agripa, len yúguꞌtëliꞌ zoaliꞌ ni tsazxö́n len netuꞌ. Ni zoëꞌ rléꞌiliꞌ‑nëꞌ bönniꞌ naꞌ, taꞌnë́ꞌ queëꞌ yúguꞌtë bönniꞌ judío nacuꞌë Jerusalén lencaꞌ nup nacuáꞌ ni, tëꞌ nedaꞌ ral‑laꞌ gatiëꞌ.