Aposolo Jaŋere Binaŋ 5:19-32

¹⁹Eme ira fohapie ŋafeo Wofuŋte aŋelozi motâc rojarerâ jowac‐jopa hurâ ʒiŋuc jazawec:

²⁰“Ŋoŋe taha ufuŋko ferâ ŋic sasawa juju hata kecʒirec biŋedâŋ jazahuc domanʒepieŋ.”

²¹Iŋuc jazame jaŋe manarâ furicte taha ufuŋko ferâ miti mumbiŋ. Ehame taha bapa sâko e â qaŋeŋfâcne jaŋe qâturerâ ŋic fekicne â Israe ŋic micne guru‐jeŋic hefârec‐jopapie furu fisimbiŋ. Erâ polisman jaŋe kâpâcwâru ficko ra aposolo rocjopapie fisiniŋte mumbiŋ.

²²Eme polisman jaŋe ra kâpâcwâru ficko basac‐joparâ risierâ mumbiŋ,

²³“Nâŋe ra fisirâ motâc kine sanaŋne bakicne honembeneŋ, erâ soŋaŋ jaŋe motâcko domambieŋ wâc. Erâ motâc rorâ ferâ ŋic ine basac‐jopambeneŋ.”

²⁴Dâŋ i mupie ufuŋte polisman micne â taha bapa micne jaŋe manapie quŋkewec.

²⁵Ehapie ŋic moczi fisirâ muwec, “Manaŋgopieŋ, kâpâcwâru ficko râec‐jopambieŋ jaŋe ufuŋko ŋic miti jazahuc domaŋgopieŋ.”

²⁶Mume polisman micne eki soŋaŋfâcne rocjopame ra aposolo urucko jowac‐jopa warembiŋ. Ŋic jaŋe qânâzi hecjopanʒipiŋte hâwic‐jopame wânʒâŋnehec ʒame kirac mi ejarembiŋ.

²⁷Eme micne bapa tutumaŋko râec‐jopapie domahapie taha bapa sâkozi dâŋ ʒiŋuc jazawec:

²⁸“Nâŋe ŋic hâcne ʒâŋe biŋe‐ticne mi mupie haŋ baocte mic muac mi eŋarembeŋ me? Eme ŋoŋe sifu dâŋ i Jerusalem haeo mocwâc muiŋneŋgopieŋ, ehuc ŋic hâcne ere kiŋ nâŋere faio râezo muŋgopieŋ.”

²⁹Mume Petoro â aposolo gâcne jaŋe dâŋ ʒiŋuc bâtikiecnembiŋ: “Ŋicdâŋ reŋkehuc Anuture dâŋ qiqikiŋ i mi fokac.

³⁰Ŋoŋe Jesu maripoŋko qarâ qâhâmopie mimiŋnefâc‐nâŋec jaŋere Anutuzi bâɋâreme faharewec.

³¹Fahareme Anutuzi e jahacne mefâreo râerâ micne sâko â bâbâpiaŋ‐nâŋec âkendâŋnewec. Eme ʒi Israe ŋic ŋoŋe maŋŋeŋic bârisiepie sâqocne‐ŋeŋic ʒureocte muekac.

³²Eme irec biŋe hâcne Tiri Mâro â nâŋe mueŋgopeneŋ. Tiri Mâro e Anutuzi micrereŋfâc‐ticne jareekac.”