Hechos 5:19-32

¹⁹Jalla nuz̈ carsilquiz chawjctaz̈ cjen ween tsjii Yooz Jilirz̈ anjilaqui tjonchic̈ha. Niz̈aza carsil zan chawjcz cjetsic̈ha. Cjetz̈cu, apostolonaca jwessic̈ha tuz̈ cjican:

²⁰—Timpluquin oka. Jalla nicju tsijtsna. Jesucristuz̈ kamaña puntuquiztan tjapa z̈oñinacz̈quiz paljayaquic̈ha.

²¹Jalla nii anjilaz̈ chiita jaru, jakataz̈uqui wentanalla timplu ojkchic̈ha. Timpluquin luzcu, tjaajñi kallantichic̈ha. Jalla nii orazakaz timplu chawc jiliriqui niiz̈ mazinacz̈tan parliz kjuyquiz ajczic̈ha. Tjapa Israel wajtchiz jilirinaca kjawzic̈ha. Niz̈aza zultatunaca mantichic̈ha, nii chawjcta apostolonaca zjijcajo.

²²Jalla nuz̈ carsilquin irantiz̈cu, nii cuchanta zultatunacaqui ana c̈hjulumi wajtchic̈ha. Quejpz̈cu quint'ichic̈ha,

²³tuz̈ cjican: —Wejrnacqui carsilquin irantiz̈cu, zuma chawjcta zalchinc̈ha. Niz̈aza ichñi zultatunacaqui z̈elatc̈ha carsil zawnctan. Nekztanaqui carsila cjetz̈cu, luzzinc̈ha. Nii kjuyltanaqui cherassinc̈ha anaz̈ zinta pres z̈oñi z̈elatc̈ha.

²⁴Jalla nii quintu nonz̈cu timplu chawc jilirimi timplu zultatz̈ jilirimi niz̈aza parti timplu jilirinacami, jalla tjappacha ninacaqui zuma kuz turwayzi cjissic̈ha, ¿Kjaz̈t cjequejo? cjican.

²⁵Jalla nii orazakaz tsjii z̈oñiqui irantiz̈quichic̈ha, tuz̈ cjican: —Anc̈hucaz̈ carsilquiz chawjcta z̈oñinacaqui timpluquin z̈oñinacz̈quiz tjaajinc̈ha. —Nuz̈ cjican quint'ichic̈ha.

²⁶Nekztanaqui nii guardiñi zultatz̈ jiliriqui ojkchic̈ha zultatunacz̈tan. Nekztan apostolonaca zjijcchic̈ha, ana chjojritz̈cu. “Chjojritz̈taz̈ cjesaz̈ niiqui, parti z̈oñinacaqui wejrnacz̈ maztan c̈hjacasaka”, jalla nuz̈ pinsichic̈ha nii zultatunacaqui.

²⁷Jalla nuz̈ zjijcz̈cu, nii parliz kjuyquin tsijtskatchic̈ha chawc jilirinacz̈ yujcquiz. Jalla nuz̈ z̈elan nii timplu chawc jiliriqui chiiz̈inchic̈ha, tuz̈ cjican:

²⁸—Wejrnacqui anc̈hucaquiz ana iya parlaj cjichintala. Niz̈aza nii z̈oñz̈ puntuquiztanaqui ana iya tjaajnaj cjichintala. Jaziqui, ¿c̈hjulu paachinc̈huctajo? Anc̈hucqui tjapa tii Jerusalén watja chjijpchinc̈hucc̈ha anc̈huca tjaajintiz̈tan. Niz̈aza nii z̈oñi contiquiztan wejtnacaquiz uj tjojtunz pecchinc̈hucc̈ha.

²⁹Jalla nekztanaqui Pedruz̈tan parti apostolonacz̈tan kjaazic̈ha, tuz̈ cjican: —Primiraqui wejrnacqui Yooz castanc̈ha. Niiz̈ jarukaz z̈oñimi cazasac̈ha.

³⁰Anc̈hucqui cruzquiz ch'awcz̈cu Jesusa conchinc̈hucc̈ha. Nekztan uc̈hum tuquita atchi ejpz̈ Yooz tii Jesusa jacatatskatchic̈ha.

³¹Jacatatskatz̈cu Yoozqui nii Jesusa pajk honorchiz cjiskatchic̈ha. Niiz̈ z̈ew latuquiz z̈elan, Yooz Ejpqui mantis poder tjaachic̈ha, Jesusa tsjan chawc jiliri cjisjapa. Niz̈aza Jesusac̈ha Liwriiñiqui, tii Israel wajtchiz z̈oñinaca kuz campiiskatajo, ninacz̈ uj pertunta cjeyajo.

³²Jalla tii puntunacquiztan wejrnacqui zizuc̈ha. Niz̈aza tisticu cjican wejrnacqui nii chiyuc̈ha Espíritu Santuz̈tanpacha. Yoozqui nii Espíritu Santo tjaac̈ha niiz̈ kuzcama kamñi z̈oñinacz̈quiz. —Nuz̈ cjican cjichic̈ha Pedruqui.