Aposolo Jaŋere Binaŋ 3:5-15

⁵Mume ŋicpuriŋzi wiac moc narezo mukopirec muhuc nâckâbâc jaha honec‐jofawec.

⁶Iŋuc ehame Petorozi ʒiŋuc âzâcnewec: “Moneŋ boreŋ wiac no mi fonarekac, wiac mocjaha fonarekac ine garepe roc, Jesu Kristo Nazarete haeonec ere micte gazape fahare hata juc.”

⁷Iŋuc murâ mefârenao rohuc bafaharewec. Ecneme izia kike bibiric‐ticne urueme fu herâ fahare domawec,

⁸erâ jahehec mâmâc taha ufuŋko fembiŋ, erâ hata juju‐ticnere kiwac qawac ehuc Anutu muteŋkewec.

⁹Eme ŋic sasawa jaŋe hata jume â Anutu muteŋkeme honembiŋ.

¹⁰Ehuc ʒâŋitarâ mumbiŋ, “Taha ufuŋte Motâcbiaŋko bâmec wiacte numu‐nârehuc ŋeekac ine hâcne.” Erâ biaŋkewec irec hone fâfârerâ mâretec seckembiŋ.

¹¹Eme Petoro â Johane jaherao qohotame ŋic mâmâc sasawa taha ufuŋ maŋne moc ʒâŋene Salomo ira jaherao tumaŋne‐fârehuc me kirâ domambiŋ.

¹²Iŋuc epie Petorozi honec‐joparâ ŋic dâŋ ʒiŋuc jazawec: “Israe ŋicbureŋ, ŋoŋe wemocte ŋic ʒirec hone warec boc enâctehuc domaŋgopieŋ? Wiac nâhe nâhâcne mitire me tâpirire e hata juju‐ticne bâfuacnekoperec me?

¹³Aricne, Abraham â Isaka â Jakobo jaŋere Anutu, mimiŋnefâc‐nâŋec jaŋere Anutu, eki hâcne kiŋaŋŋic‐ticne Jesu ere Wofuŋ qâreŋ ŋic kecʒirec faio bâfuame honeŋgopieŋ. Ŋoŋe ine e qaisockerâ qâpuc jaŋerao râembiŋ. Ehame Pilatozi firuezo mume ŋoŋe qikiŋnembiŋ.

¹⁴Ine hâcne Maŋɋaɋac â Tiŋne rune e qikiŋnehuc ʒika qaqaŋic akicke‐ŋareocte mu bâuruec ecnembiŋ.

¹⁵Ehuc jujure Micne bapa qambiŋ. Qapie Anutuzi bâɋâreme hâmockonec fahareme ʒâŋe fâri‐nâŋeczi qame honembeŋ.