Atos 3:5-15

⁵Agueduo myani mâkâ uguondo MYK idyly eyanmo. — Ydinheruru nhudulymo wâne isenra — kely tyangahu oday.

⁶Warâ olâ myani Pedro aguely: — Tydinherugunepa urâ. Dinheru takaze kehoem koendonro olâ ise âyam kâunduly. Jesus Cristo Nazaré donro eon-honrugue âyam auguely: “Aukâ. Adakobâgâ warâ” — kely.

⁷Agueypyem myani Pedro mâkâ uguondo emary aho eynynonro wâgâ nhawâdyly, sautoem. Ilâ umelâ kehoem myani mâkâ uguondo saudyly, adakobâdyly warâ.

⁸Kua itybyem tawylygue, tuomarugue tadameze kehoem myani Deus ety idaseraji idâly, Pedro, João warâ agâ. Warâ myani aguely: — Deus, koendonro kehoem âmâ, kua yetai — kely.

⁹Idânârâ tonlo modo emâmomy mâkâ adakobâdyly, adamely warâ. Deus koendonroem awyly wâgâ aguely tydasemo lâpylâ myani.

¹⁰Âseguâdâmâmomy mâkâ koendâ adakobâdyly tientuomo. Aituo myani âjigue aguelymo: — Mâkâ pyantano adakobâdânrybyrylâ awâkâ. Aunlolâ inanry sakadaynrim modo nhekaendyly. Etaungâ! Adakobâdyly, adamely warâ aidyly! Ânguy nheinwânkylyemba lâgâlâ! — kelymo.

¹¹Mâkâ uguondo adakobâdânrybyry Pedro, João warâ agâ tâise lelâ myani; Alpendre de Salomão keho taserano oday myani akaemo azagâ tokalâ warâ. Mâkâ kua itobyry wâgâ tâsewânilymogue myani kurâ domodo tâgaune kehoem idâlymo eyanmo, kua ityby ese.

¹²Târâ toenzepa kurâdo âtâdyguyly tientuo myani Pedro aguely eyanmo: — Nhaum, koendâ ydataungâ, kydamu Israel iweom. Tâseguâdâzeba itaungâ. Xina arâ kâzesedaundâ. Ton-honrugue inkâba enra xina merâ adakobâdânrybyry kua nhedyly. Xina koendonroem awylygue inkâba merâ adakobâdyly.

¹³Kydamudo Abraão, Isaque, Jacó warâ iDeusry enra Jesus eon-honrugue kua itoem aieni, koendonro, ton-honreim waunlo Jesus awyly tienehon-hoem. Tâmaryem myani Deus, Jesus ingonodyly. — Alâ olâ keankâ pymâ modoram mâengamelymo, kruz wâgâ iguehoem. Pymâ Pilatos wâne keankâ tienagazenehondyzeba. “Kruz onwa sakâjien-hongâ iguehoem!” myguewâtaundâmo olâ.

¹⁴Koendonro, âdaini keba keankâ mâkâ Jesus. Pilatos nenagazenehomba itoem âkeá myguepa olâ mataunaguynre. “Kyârim Barrabás etaguehongâ. Jesus kruz onwa sakâjien-hongâ” myguelymo lelâ keankâ.

¹⁵Kyigueânehondânry keankâ iguedyse matomo. — Deus kurâem nietondâ olâ-ro warâ. Jesus kurâem itybyem awyly, tutuze xina, tientobyry wâgâ, aguely tindatobyry wâgâ warâ.