Aposolo Jaŋere Binaŋ 22:12-24

¹²“Hae ira ŋic moc juwec ʒâŋene Anania, e sâcmutâc dâŋ aimuŋ bâninipehuc jume Judaŋic hae ijaha jumbiŋ jaŋe ʒeŋgoma ere manapie biaŋkewec.

¹³Ŋic izi hâcne norao fâ fisirâ ʒiŋuc nazawec: ‘Qomâ‐nane Saulo, go ʒâŋe fitâcnec.’ Mume izia fitâcnerâ e honepo.

¹⁴Eme dâŋ ʒiŋuc nazawec: ‘Mimiŋnefâc‐nâŋec jaŋere Anutu eki fuŋne‐ticne gaza gowatuc eme tiŋne rune honehuc micticnaonec dâŋ manacmurâ rowosâecguwec.

¹⁵Eme go wiac hone manac emeŋ irec biŋe mâreŋ sâc ŋic jaza razemec.

¹⁶Eme ʒi weniŋuc mâc jutec ʒoraocmu? Go faharerâ Jesure ʒâŋe riwasecketec Miti Opâ rua‐garepe sâqocnege tâmirezejec.’

¹⁷“Eme no Jerusalem haeo risierâ taha ufuŋko ferâ numupe maŋnane ŋerisieme Jesu honepo.

¹⁸Honepe ʒiŋuc nazawec: ‘Hae ʒirec ŋic jaŋe gore mickonec dâŋnane manarâ qikiŋneniŋmu, irec go picpac Jerusalem‐konec wiserâ rac.’

¹⁹Mume no dâŋ ʒiŋuc bâtikiecnepo: ‘Wofuŋ, no ŋicfâcge kâpâcwâru bacjoparâ mitificne ficne bacjopa ferâ kâcbiŋzi jopahuc jupo,

²⁰erâ biŋe mumuge Stefano qaniŋte ŋaqi‐jeŋic guruckepie soŋaŋke‐jarehape qapie manape sâckewec, i hae ʒirec ŋic mana‐fâreŋgopieŋte gore biŋe sâcne jazapemu.’

²¹Iŋuc mupe Wofuŋzi ʒiŋuc nazawec: ‘Go ʒawietec no mâreŋ wiwicko qâpuc jaŋerao sorecgupe razemec.’”

²²Ŋic jaŋe hazec‐jeŋic râehapie Paulozi dâŋ gâcne jazawec. Izi miŋecne dâŋ iŋuc mume ɋeŋɋeŋnea owa ruruckerâ mumbiŋ, “Ŋic iŋucnezi arictac eoc, jume mamakâcne ekac.”

²³Iŋuc owackehuc ŋaqi‐jeŋic ʒoricne hetararâ rufe tiepie feme

²⁴soŋaŋ sâkozi mume momori jaŋe Paulo ficjeŋicko bafembiŋ. Erâ ŋic jaŋe wemo wiacte boc owackecnembieŋ irec fuŋne mufuame manazore kâcbiŋzi qaniŋte mujarewec.