Loc Hechos 22:12-24

¹²‘Afénomo ite Ananíasna mámecɨredɨmɨe. Afémɨe ɨere Moisés ocuícafuemo ɨ́ɨnofɨrede. Nana Damáscomo ite judíuaɨ ñúefuena íemo nitáfɨrediaɨoɨ.

¹³Iemo afe Ananías cue uáiduaɨbite. Billano cuena daɨde: “Cue ama Saulo, o ui meine nane cɨ́oiteza,” daɨde. Daɨí daɨna llezica meine cue ui ñue cɨ́oide. Afémɨena cɨódɨcue.

¹⁴Mei jira afémɨe cuena daɨde: “Caɨ jáiairagɨma Moo Juzíñamui nɨzécamɨedɨo. Afémɨe jaiai nɨnómona ona nɨzede íemo o táɨjɨllɨfuiaɨ jino omo llóllena. Ua dama Jesús fuémona ie úrilla uáillaɨna cácaitɨo. Afe llezica jaɨ́cɨna ñue fɨnófɨredɨmɨena Jesuna cɨ́oitɨo.

¹⁵Mei o cacánafuiaɨ o cɨónafuiaɨ dɨga nana comɨnɨ uícomo jino llóitɨo.

¹⁶Mei birui ¿mɨnɨ́cari jɨzídɨo? Náidacaillano o báutizatari. Ocuíraɨma Jesús mámecɨmo ñue ɨ́ɨnori. Afedo o fɨénidɨfue jae muiñócaza,” dɨnori Ananías daɨde.

¹⁷Pablo naɨ úrite. Iaɨoɨna daɨde: —Jerusalemo meine cue billa llezica, Juzíñamuimo gaɨríracomo úrizaidɨcue. Dɨnomo nɨcaɨ anado cɨódɨcue.

¹⁸Caɨ Ocuíraɨma Jesuna cɨódɨcue. Afémɨe cuena daɨde: —Jerusalémona mai raɨre oni jai. Afémacɨ cuedo o úrillana jíeruiñeitiaɨoɨ, —daɨde.

¹⁹Jira Ocuíraɨmana daɨdɨcue: —Nana afémacɨ omo ɨ́ɨnotɨnona llófueriracomo cue lláɨtainafuena onódiaɨoɨ. Llavéracomo íaɨoɨna fácana cue uilláfuemo uibíoidiaɨoɨ.

²⁰Esteban o mámecɨdo úrite táɨjɨtagamɨe. Afémɨe tɨ́ide dɨe tota llezica afénomo itɨcue. Aféfuemo “Jii” daɨdɨ́mɨedɨcue. Ie emódomo Esteban fatɨ́mɨe ɨnícuirona oni llɨ́idɨcue, —daɨdɨcue.

²¹Mei íadɨ Ocuíraɨma cuena daɨde: —Mai jai. Judíoñedɨno cɨ́gɨmo jɨca ona óreitɨcue, —daɨde.

²²Afe dɨnó afeno comɨnɨ íanori tɨɨ daɨdíaɨoɨ. Mei íadɨ dánomo nane caillɨ́oicana daɨdíaɨoɨ: —¡Bie ɨima dama tɨ́ideza! ¡Afémɨe cáaillɨnona íñeite! —daɨdíaɨoɨ.

²³Naɨ are caillɨ́oidiaɨoɨ. Ɨere icɨ́rillano danɨ íaɨoɨ ɨnícuiruaɨ cúacoɨdiaɨoɨ. Afe llezica enɨ́chomaɨaɨ caifo táɨnomo júcoɨdiaɨoɨ.

²⁴Ie jira llaɨzɨ́raɨnɨ illaɨma Páblona íaɨoɨ gaɨríracomo orede. Oriano dɨnomo zechénotade ie fɨnócafue jino llóllena, comɨnɨ rɨire íemo fɨeni caillɨ́oinafuena onóillena.