Aposole 5:1-12

¹Dee akali mende Ananayasa lenge dokopa baanya enda Sapaita lenge dokopa dolaponya yuu mendeme muni nyiambi-pyaa.

²Muni nyepala akali dokome muni dokonya mendatupa baa tangenya setea-pyaa. Dopa piamo doko etanengeme apata kandeaka-pyaa. Muni yangi mendatupa minao ipupala aposele dupanya kingilyaka setea-pyaa.

³Dopa piamopa Pitame baa pisoo, “Ananayasa, embame aipuma Satane doko embanya ingi monapinya ipao tumbina kayalepe? Embame aipuma Oli Sipitisa doko sambo pii lamaitala, yuu dokonya muni mendatupa tange nyoo setalepe?

⁴Akali mendeme embanya yuu doko sambao nyepala nayamopa emba tange-kisa sala nayape? Enakao yuu dokome muni nyepala muni dutupa pitaka emba tangemeaka isala nayapipi? Aipuma emba tangeme mana koo dake masipipi? Embame endakali mende sambo lamaiya naenya, Gote kandao sambo lamailinona,” lea-pyaa.

⁵Pii dutupa soo Ananayasa baa lombapae sepala kumia-pyaa. Ananayasa doko kumalamo lapae siamino endakali dupa pitakame pakame kumiami-pyaa.

⁶Akali mendapuame sakatatala baa yaki pyoo soo kamaka pupala malu piami-pyaa.

⁷Maitakao baanya etanenge dokome Ananayasa kumalamo lapae doko nasoo ipupala andaka kolandea-pyaa.

⁸Kolandateamopa Pitame baa pisoo pituu, “Nyalambonya yuu dokome muni datupaka nyiambipi, namba langi,” lea-pyaa. Dopa leamopa enda dokome, “Kini, dutupaka nyiambana,” lea-pyaa.

⁹Ongopa Pitame baa lamaiyoo, “Nyalambome aipuma mona mendai paliuu Kamongonya Sipitisa doko minao makande pilyambipi? Embanya akalingi malu pyaa pamino dupa kyuku lao kambusa ipatalumino dupame emba kamaka soo paaminoakana,” lea-pyaa.

¹⁰Pitame dopa lalu piamopa enda doko Pita kateamo dosa lombao sepala kumalu pia-pyaa. Dokopa akali dupame andokote ipupala kumapae siamo doko kandatala soo kamaka pupala akalingi malu petae kateamo dosaka malu piami-pyaa.

¹¹Tenge dokonya sosanya endakali dupapi pii siamino endakali dupapi dupa pitakame pakame kumiami-pyaa.

¹²Dee Goteme endakali dupanya kaina dokonya kongalipi kalai paka pipaepi longo dupa aposele dupa-kisa pyoo katea-pyaa. Masoo miniamino dupa pitakame losuu anda andake kame Solomone lenge dokaita mona mendai paliuu ipao limbao katengema-pyaa.