Hacutjin Casahmi Apóstol 5:1-12

¹Peru ngu nga cha xi hmí rë Ananías cojo na Safira chjuun rë cha ne, hacuaha caviteña xu cha ngu rquí nangui.

²Peru cafahaxin suvá cha hitsë tujún jan, sehe quiji cani cha hitsë tujún xi cavangui jan tsja apóstol, sacuaha xi ha vëhë yëjë ni chji rë nangui jan. Hane na chjuun rë cha jan ne, hacuaha vëë xu na xi cuatjin casahmi cha.

³Ngajan xi cachjataha xu Pedru cha cuitjin: ―‍¿Mé má cuatjin caningatihin xi catsë Satanás xahasen riji, ngaye Ananías? ¡Xitsehen vëhë casahmi xi cachjehexin sove hitsë tujún tsëhë chji rë nangui xi caviteñi! ¡Xitsehen vëhë casahmi xi meje cuindache rë Hasen rë Nina!

⁴Xi chaja sa cuiteñi nangui jan ne, ha hye ta tsiji. Hacuaha ngu ndiya xi ha caviteñi ne, hacuaha hye ta tujún rë ne, tsiji. ¿Mé má cuatjin caningatehetacuin xi nihñi ngu cjuatacun tsehen vi ni? Hacuiin ngayin ni xuta xi meje cuindache niji ta hisca cojo Nina meje cuindache rë me. ―‍Cuatjin cachja Pedru.

⁵Xi tu cahndë cha Ananías cjua jan ne, caticja cha, hane cahme xu cha. Hane yëjë xuta xi camachaya rë cjuacjintacun jan ne, jemu catsacjun camaha xu ni me camá.

⁶Ngajan xi ngujo cha ne, cavaxtë cha nima ngu tsjian ne, sehe cafaha cha quiji caveyaniji cha.

⁷Hya xi camá ne, xi cavatju sacuaha chuva rë jyan hora xi cahme nima jan ne, cafehe xu chjuun rë nima ngajan hiscan siu apóstol jan. Peru cjëë cumachaya rë na hacutjin xi cavatju nima xihin rë na camá.

⁸Ngajan xi cavinenguise xu Pedru na cuitjin: ―‍Tinoje cojo ná. ¿Há caviteñu nangui sacuatjin chji vihi? ―‍Juun. Chji vëhë caviteñi. ―‍Cuahaxutjin cachja na.

⁹Sehe ngajan xi cavinenguise nga xu Pedru na cuitjin: ―‍¿Mé má cuatjin sacuaha catsingataha cacun nima xihin riji ne, cuatjin caningatehetacuin xi meje cuindachun Hasen rë Nina? Chutsijin ta cuacun cha xi quiji caveyaniji rë nima xihin riji nduva cha jan. Quihndë ne, hacuaha cojo ngaye cuatjin cuatji cuma. ―‍Cuatjin cachja Pedru.

¹⁰Ha hora vëhë ni ne, caticja xu na hiscan secun Pedru, hane cahme na. Xi tu cavisehen nga cha xi cuacun jan ne, ha cahme xu na xi tu cavëë cha. Sehe ngajan xi cafaha cha nima jan, quiji caveyaniji cha tjehen rë hiscan caseyaniji nima xihin rë.

¹¹Hya xi camá ne, yëjë xuta rë yungun cojo yëjë sa xuta xi camachaya xu rë cjuacjintacun jan ne, jemu catsacjun camahani me camá.

¹²Hacuaha apóstol xi cuacun jan ne, jemu cjín cjuarcun xi casahmi xu me ngajñi rë xuta nandya. Hane ngajan ndatsen yungun xi matitjun, hiscan ngahma Ndihya Tsëhë Salomón ne, ngajan xu ma tangun yëjë xuta ladu rë Jesús.