Aposol nup meme 5:1-12

¹Mewö aka malgetmö, azi kun qetŋi Ananaias anömŋi qetŋi Safaira yetkön nup gölmeŋiraŋgö bahöŋi bohonŋi memegöra alohot.

²Alohotka söŋgöröŋi kaiga azinöŋ moneŋ bahöŋi nanŋaŋgöra aŋgön köla asamböri anömŋan mi möt teköi bahöŋi kun memba kaba aposol yeŋgö böröŋine alök.

³Böröŋine alökmö, Pitönöŋ kewö jiyök, “O Ananaias, gi mönö wuanöŋgöra Satan qahö qetalnöŋga urugi kokolak qeza? Yaŋön urugi kokolak qeiga göŋön esapköba Uŋa Töröŋi isimkakalek ak waŋgiba nup gölmegö moneŋ bahöŋi aŋgön köla asambötzan?

⁴Gi miaŋgö toŋi aknöŋi, nalö miaŋgöreŋ mi nangi buŋaya ahök me? Aiga nup gölmegi bohonŋi megetka söŋgöröŋi kayöhi, moneŋ mi mönö göhö buŋaya ahök me? Gi mönö wuanöŋgöra urugan keu jöhöba yuai ki akzan? Gi muneŋ jiba mewö miaŋön ambazip qahö tilipköm neŋgizanmö, Anutu nanŋi mönö tilipköm waŋgizan!”

⁵Mewö jiiga keu mi möt sasauba tala gölmenöŋ geba kömuyök. Mewö kömuiga ambazip pakpak miaŋgö buzupŋi möta sömbu mötmöt ketaŋi aket.

⁶Kömuiga azi gwabö yeŋön kota qamötŋi memba esuhuba aŋguba anda löm kölget.

⁷Aua karöbut teköiga anömŋan yuai asuhuyöhi, mi qahö möta kayök.

⁸Kaiga Pitönöŋ anömŋi Safaira kewö qesim waŋgiyök, “Iŋiri nup meme gölmeŋiri bahöŋi bohonŋi memegöra alohotka moneŋ kayöhi, mi miaŋgö dop me qahö? Mi jinöŋga mötpi!” Qesim waŋgiiga kewö meleŋnök, “Moneŋ mi ölŋa miaŋgö dop kayök.”

⁹Mewö meleŋniga jim waŋgiyök, “Iŋiri mönö wuanöŋgöra urumohok aka Kembugö Uŋa Töröŋi tilipköm waŋgizahot? Mötnöŋ, apkan kömuiga azinöŋ memba anda löm köljei, yeŋön mönö naŋgu ki dopdowigetka kourukŋi mötzan. Yeŋön gi mewöyök esuhuba aŋgum gihiba anme.”

¹⁰Mewö jiiga miaŋgöreŋök tala Pitögö könaŋe geba kömuyök. Kömuiga azi gwabö yeŋön kota qamötŋi miwikŋaiba memba aŋguba anda apŋaŋgö qöhöröŋe löm kölget.

¹¹Löm kölgetka urumeleŋ kambu jömukŋi yeŋön möta awöwöligetka buzupŋi sehiiga körek pakpak mötketka sömbu mötmöt ketaŋi aket. Mewö.

¹²Mewö aketka Anutugö kukösumŋan aposol inahöm eŋgiiga nup memba böröŋini ambazip qakŋine algetka Anutunöŋ aiwesök aŋgöletot meiga sutŋine gwötpuk asuhuget. Ambazip Jisös möt narigeri, körek yeŋön jöwöwöl jikegö tohoŋ uruŋe öŋgöba kiŋ Solomongö sombem söranŋambuknöŋ tokoba kambu mohot aka malget.