Aposol 5:1-12

¹Tomowa sago kana vava Ananayas, ma kawana Sapira yavata i tano ivi gimarei.

²Ma Ananayas mane nevanevana ivoviviri ma nevana aposol iveresi. Ma ke iti debei kurisi da nevana ivotani, ma kawana ivi vaghinei da weni berana iberai.

³Ma Pita ivona bo, “Ananayas, avi kubiine kuvi vaghinei da Seitan ivi nowem na Kanuma Vovokaravina kurina kuvi bero da am tano manena nevana kuvoviviri?

⁴Tanona rapemuwai ma kuvi gimarei, tuna kubiine manena na tam am mane, am kayowanai kuta berai. Avi kubiine weni berana berona kuberai? Ke wawaya kurikai kuti bero, ma God kurina kuvi bero!”

⁵Ma Ananayas weni sisiyina ivi yanei na yaghiyaghina ipeku da irabobo. Wawaya peyarisi ivi yanei da aviyavisina itupuwa na iyabumana kirakai.

⁶Ma vaghina, yaraga ivomiiri da tupuwina igerei ma ikavari ikiibau da idogoi.

⁷Ke mara gurina ma kawana irui, ma ke itakovi da aviyavisina itupuwa.

⁸Ma Pita wavinena ivi tarakiiyanei bo, “Kevoneku, tam ma Ananayas tano kovi gimarei na manena kudubina weni, bo?” Ma wavinena ivona bo, “E, vaghina manena.”

⁹Ma ivonapotei bo, “Ikikava konotanotai da Bada ina Kanuma Vovokaravina koti beroberowei? Kekitai, yaraga kawam idogoi na enenekiibau ku matuketa. Ma tam bade ina kavarakiibuwem.”

¹⁰Ma yaghiyaghinai wavinena Pita maghinonai ipeku da irabobo. Ma yaraga irui ma ikitai da irabobo ma ikavarakiibuwei da kawana ririnai idogoi.

¹¹Ma vitumaghana damsi kudubisi ma bade wawaya peyarisi weni berasi sisiyina ivi yanei na iyabumana kirakai.

¹²Aposol bera ghamaghamasi ma matakira peyarisi wawaya kamosiyai iberaberai. Ma mara nonowa vitumaghana damsi Soromon Ina Tupatina kamonai ivivi kiidaburana.