Apostolo 5:1-12

¹Iesen tiga tunotuno a hinsana ne Ananias, tika ma no uno hahin Sapira, dir ga suhurane mah audir tiga katona pise.

²Ma tano udir suan lilik tika, Ananias ga palim dit tar at ari kinewa wara uno iaat ma ga kap ing ga kis taar ma ga tar ta ira apostolo.

³Sen bia Pita ga tange tana, “Ananias, hohe bia u bale leh Sataan bia na kure ugu wara hamhabato no Halhaliana Tanuo ing u palim dit leh ari tano kunkulaan tano pise wara num at?

⁴Ga num at no katona pise ing pau ga suhurane baak ie. Ma bia namur ta ing u gate suhurane tar ie, ira kinewa a num at mah. Asa i gil ugu bia nu lik leh wara gilgil iakan ra mangana tintalen? Pau harabota ra matmataan ta ira tunotuno. Taie. U te harabota ra matmataan tane God.”

⁵Ing at mon Ananias ga hadade tar kaiken, ga puko ma ga maat. Ma a tamat na bunurut sakit ga kap diet ing diet ga ser iakan.

⁶Ma ira marawaan diet ga hanuat ma diet ga me pulus no palatamaine ma diet ga kap leh ie diet gaam a bus ie.

⁷Namur dahin no uno hahin ga me haan laka ma pa ga nunure bia asa gate hanuat taar.

⁸Io, Pita ga tiri ie bia, “Hinawase iau, kaiken bakut ira kinewa ing mur ma no num tunaan, mur kap tano pise?” Ma no hahin ga haut ma ga tange, “Kaike at mon ira kinewa bakut.”

⁹Pita ga tange tana, “Hobibih bia mur ianga tika wara walwalar no Tanuo tano Watong? Nanaas baak! Ira tunotuno ing diet bus no num tunaan, diet tuai kenas ra matanangas ma diet na kap leh mah ugu.”

¹⁰Kaik at mon no hahin ga puko taar ta ira kakine Pita ma ga maat. Io, ira marawaan diet ga laka ma ing diet ga nes ie bia gate maat, diet ga kap leh mah ie ma diet ga bus ie harue no uno tunaan.

¹¹Ma a tamat na bunurut sakit ga kap diet ira matanaiabar na lotu ma diet bakut ing diet ga ser kaiken ra linge.

¹²Ira apostolo diet ga gil ra haleng na dadas na hakilang ma ra gingilaan na kinarup nalamin ta ira matanaiabar. Ma ira ut na nurnuruan bakut diet git hanhanuat hurlungen ma tiga lilik aram ra maliah ta Solomon.