Yɛbəc 5:1-12

¹Wərkun wəlɔma ɛnayi pac-we kɔ Ananiyas, kɔ wəran kɔn Safira, kɔ ŋaŋcaməs antɔf ŋaŋan.

²Kətəŋnɛ disrɛ kɔ wəran kɔn, k’Ananiyas embelər kəway ka antɔf ŋaŋɔkɔ, k’ɛŋkɛrɛ kəway kələpəs nkɛ k’ɔŋkɔ pəbocər ki asom a Yesu dəntɔf.

³Kɔ Piyɛr eyif kɔ: «Ananiyas, ake ’sɔŋɛ ntɛ məwosɛ Sentany səsɔŋ am kəyembər Amera Ŋecempi mɔ? Məmbelər kəway ka dalɛ.

⁴Ntɛ dalɛ dandɛ dɛnayɔnɛ dam mɔ, ak’ ɛnasɔŋɛ ta məmɛŋkərnɛ di-ɛ? Ali ntɛ mənacaməs di mɔ, pəsam papɔkɔ, bafɔ pam pɛnayi ba? Ake ’sɔŋ’ am kəyɔ tantɛ-ɛ? Bafɔ afum ŋɔ məyembər de, mba Kanu!»

⁵Ntɛ Ananiyas ene moloku mamɔkɔ mɔ, k’ɛntɛmpɛnɛ, k’eŋgbiŋ kifir, k’efi. Kɔ kənesɛ kəpɔŋ kəsumpər akɔ ŋanane ti mɔ fəp.

⁶K’atɛmp ŋayɛfɛ kɔ ŋanɛpsər kɔ dəkasaŋke, kɔ ŋaŋkɔ ŋawup.

⁷Ntɛ dec maas deŋcepər mɔ, kɔ wəran ka Ananiyas ɛmbɛrɛ, ta ɛŋcərɛ tɔkɔ tɛnacepər mɔ.

⁸Kɔ Piyɛr eyif kɔ: «Məlok’ im ma kaŋce: Kəway kaŋkɛ kɔ nəŋcaməs dalɛ ba?» Kɔ wəran nwɛ oloku «Ɛy, kəway kaŋkɔ yati kɔ.»

⁹Kɔ Piyɛr oloku kɔ: «Ake ’sɔŋɛ ntɛ nəntəŋnɛ kɔ nəwak Amera ŋa Wəbɛ mɔ-ɛ? Məcərɛ a aŋɛ ŋawup wos əm mɔ, ŋayi nde dəkusuŋka, kəkekərɛ kɔ ŋander sɔ məna.»

¹⁰Gbəŋcana babɔkɔ k’ɛntɛmpɛnɛ kɔ wɛcək dəntɔf, k’eŋgbiŋ kifir. Kɔ atɛmp ŋambɛrɛ kɔ ŋambəp kɔ pəfi. Kɔ ŋaŋkekərɛ kɔ, kɔ ŋaŋkɔ ŋawup wos kəsək.

¹¹Kɔ kənesɛ kəpɔŋ kəsumpər kəloŋkanɛ ka alaŋ fəp kɔ akɔ ŋanane moloku mamɔkɔ mɔ.

¹²Asom a Yesu ŋaŋc-yɔ mɛgbɛkərɛ kɔ mes mɛwɛy-wɛy mɛlarəm mmɛ mɛnayi afum dacɔ mɔ. Alaŋ fəp ŋanacəmɛ kəfo kin nde akɛr nŋɛ aŋc-wenɛ «Akɛr ŋa Suliman» mɔ.