Aposelo 3:4-14

⁴Pita Yonetame einago nepikakete Pitayo okome tota nepikamene wa okale

⁵padeya mouno wene pikome nepikaneya.

⁶Nitikale Pitayo okome silepa kue golo kueka toamokoyake padeledo ne auapeane touno,

⁷Nasarese Yesu Keraisu patu kautakoane kakene ukuno, kamokoa pa wa ootokoa one nimini yono moa katekamotokale eina eina one kawata one kawa lamenetaka tele tootapeka.

⁸Nitikale tigoa kamokoa kakome opi yamele toko wa yakeneya. Nitoa Pita Yoneta-pala tobou losu yapu opia pome Akolali kei pia tigawineya pekeneya.

⁹Nitima pokale enekete peyame ekete ekee i agopa tobou losu yapu koniyo kagoke-kama mekome kue oia mekanakagono, ke ke wa one-pala tokanakaleke ka̱ oa kakeneya.

¹¹Pita Yonetame latekakoinakagomepa einagota yono mokoa kakaka ali atoa wapokamoa pote unukamoa kakeneya. Nipa Solomono wa yomini kayo oa ibini akene lono ka̱ akeneya teyapea pote kakeneya.

¹²Nitikoli enekome Pitayo e yene-pala okome Iserele yene anu oya-lawe edekolo wene kainya pianeya kakete tota lene wikoa kaki-pe. Totame Akolalinele wedoa takama yakete tekete i agopa tone teleme kamotokakoono wene pikete tiki-pe. Tone teleme pade latekamele toamokoyake

¹³Akolaliyo latekaneya. Nipa one patu-kama kautakoa kako ago Yesupa ali atoame kei pimotoa tokome taneya. Tone kaua-mene Eberame Yekobeta Aisake toa yopikoa kako Akolalike uku. Eni Yesupa Pailaseyo pitia yakakamotoa kime aua pote mepokoina. Nitikoli pitia yakatekoa i ago po kotokoane wetekou wa okake Yu yene kini Yesu tumotono wene pikete wakoina.

¹⁴Nipa Akolaliyo one wa takoa moa kakapikago Yesu wene ki̱yo akeneya-kama mekago eni wakoina. Nitoapa ali-kiti wia tukakala tane ago Barabasi po kotokoa wetekaka-ye wa okoina.