Loc Hechos 3:4-14

⁴Mei jira Pedro Juan dɨga íemo érocaidiaillɨnoɨ. Pedro íena daɨde: —¡Caɨmo érocai!

⁵Iemona afémɨe náɨcaide. Comecɨ anado daɨde: “Nɨbaɨ mɨnɨ́cana cue iite.”

⁶Iemo Pedro íena daɨde: —Cue úcubenidɨcue; óronidɨcue; mei íadɨ cuemo ítena o íitɨcue. Nazaret ímɨe Jesucristo mámecɨdo náidacai. Maca, —daɨde.

⁷Iemo Pedro onoɨ nabézido íena naidánete. Afe daɨí fɨ́nua llezica ie ɨdaɨ maɨríbicaide, ie ɨdácoiñuaɨ dɨga.

⁸Iemona aɨdaima caifo tícacaide. Caifo náidaillano macade. Afémɨe íaillɨnoɨdo ja jofo gaɨríracomo jaide. Tícaticacana jaide. Juzíñamuimo ióbitaoide.

⁹Nana comɨnɨ ie mácana cɨódiaɨoɨ.

¹⁰Aferi ɨere jacɨ́naificaidiaɨoɨ naa abɨ fáɨgacaillafue dɨga, afémɨe daɨí náidacaillari. Afémɨena onódiaɨoɨza. Afémɨe Ebíredɨze mámecɨredɨzemo ráɨifɨredɨmɨe, gaɨríracomo úcube jɨcáfɨredɨmɨe.

¹¹Jíllotaga aɨdaima Pedro Juan dɨga íaillɨnoɨdo níjinijicaide. Aféfueri fáɨgacaillano nana comɨnɨ gaɨríraco dɨbénemo jáidiaɨoɨ. Salomón jinófenemo macáranomo Pedro, Juan, aɨdaima dɨga illánomo afe comɨnɨ aizɨ́cana jáidiaɨoɨ.

¹²Pedro áfena cɨ́oillano comɨ́nɨna daɨde: —Ɨsrael naɨraɨ, cácarei. ¿Omoɨ mɨnɨ́cari fáɨgacaidɨomoɨ? ¿Nɨbái mei cócomo eróizaɨbitɨomoɨ? Bie ɨima dama coco rɨ́inodo jíllotano macátatɨcoco, nɨbaɨ daɨí comécɨdo daɨdɨ́omoɨ. Daje izói coco Juzíñamuimo ñue comécɨinafuedo afefue fɨnódɨcoco, daɨí nɨbaɨ cócona comécɨdo daɨdɨ́omoɨ. Iadɨ aféfuiaɨdo fɨnóñedɨcoco.

¹³Mei íadɨ jɨáɨfodo joide. Caɨ jáiairagɨma Abraham, Isaac, Jacob dɨga, íaɨoɨ Moo Juzíñamui ie Jitó Jesumo baɨmo ñúefuena nitade. Afe Jesús rɨ́imacɨmo omoɨ fecácamɨe. Pilato ie zuitáacana llezica áfena ráiruitɨomoɨza.

¹⁴Aféruido jaɨ́cɨna nɨ́fuenidɨmɨe zuitátajana jɨcáñedɨomoɨ, mei íadɨ jɨáɨfodo jɨcádɨomoɨ. Come fatɨ́mɨe zuitátatɨomoɨ.