Ni been ree apóstoles 3:4-14

⁴Baguiaa reeman lojman, dxel rëb Bëd lojman: ―Baguiaa du lojn.

⁵Chi biguiejnman rëb Bëd zian, dxel baguiaaman loj reeman, naladxaman milia nudëëd reeman lojman.

⁶Per rëb Bëd: ―Ad raꞌptan plajt niꞌqui or par gunen lojl, per ni zajc günan por lüj günanan: Por xguialrniabee Jesucrist bén Nazaret, guzuli, guza.

⁷Dxel gunaazaman yaaman ladbee, bazuliman laaman. Loj hor zii gajc guyu ree guiaꞌman gojl,

⁸abiꞌ gutiajsaman, guzuliman guzuloj cazaman. Dxel guyunëman laa reeman lën yadoo guin, cazaman, catiajsaman cuzaꞌt tëëman Dios zagdxe.

⁹Graczi ree bén cuguiaa laaman cazaman cuzaꞌt tëëman Dios zagdxe,

¹⁰dád badxa loj reeman bidxeb tëë reeman guial gojc zian guial nünbee reeman bén guin, ragbee tëë reeman laaman rbej roꞌ xport yadoo guin ni la Port Zaꞌcdxoon, rniabaman carda.

¹¹Ad riroꞌnladxt bén bayajc guin Bëd con Waj. Dád badxa loj ree bejn, abiꞌ baxüün reeman wej reeman lod la xcurdur Salomón lod zaꞌ ree Bëd con Waj.

¹²Chi baguiaa Bëd zian, rëbaman loj reeman: ―Bén Israel, ¿chexc zeel radxa lojdi ni goc? Ad naladxidi por dunujn rza bén guie guial nacaꞌn guialrniabee o guial nayajcan naya delant loj Dios ya.

¹³XDios dux béngulal ree Abraham, Isaac në Jacob, laaman badëë guialrniabee loj Jesús, bén bayüdi loj guxtis. Abiꞌ chi guyën Pilato nuslaaman laaman, ad cwëjbtidi.

¹⁴Luar niniabidi nuslaa Pilato bén naya nali, bén rüjn ziꞌc rayal, gunabidi baslaaman tijb xin bagüjt bejn.