MII GUN MIINU MO 3:4-14

⁴Dhala Buṯerus mmohila a’di a’di ka ’thime/ nyaḵ ka Yohaan si’da/ mo tani a’di o a’di gwo mo ki: Hili am mo ma.

⁵Dhali a’di ki ha gwom buni e mo mmoṯosh ki a’di midi ’taki bu’th toŋ kamu/ ’peni uni mo.

⁶Hila Buṯerus o a’di gwo mo ki: ’Dolkon kush dhali ’dolkon gana/ p̱iyini aha/ mo tani hili a’di jin taka/ mo tani a’di imiga/ ic̱i /e mo. Ki gway ma Yesus Ḵrisṯẖos gi Pa Naasira mo tani yayi ki sho’k mo ma.

⁷Dhali a’di ki bu’th a’di ime’da bim poros mo dhali ’de’k a’di ki mis mo dhali ise/ sho’k piti dhala simam bam sho’k piti bu’th ’bi’th mo.

⁸Dhali mmop̱ena a’di imis mo tani a’di doshki’d mo dhali ṯel moya ’pen mo dhali a’di seki’d nyaḵki uni e gu’b gi mondheleladhelel mo mmoya ki sho’k mo dhali mmop̱e mo dhali mmomaŋa Arumgimis mo be.

⁹Dhala ris ’kwani ’baar mo mishki a’di mo mmoyana a’di ki sho’k mo dhali mmomaŋa a’di Arumgimis mo

¹⁰dhali uni nyiṯẖkin ki a’di ta a’di jin c̱a’bki’d mmo’tho to i’Twaŋkal Jaro/ gi gu’b gi mondheleladhelel mo be. Dhali uni meren ki mer jin shiyi’d mo dhali mmoda/ar a’di kagahara gom a’diyin jin p̱u’dki’d e a’di mo be.

¹¹Hili ka Buṯerus uni ka Yohaan mmobutha a’di a’di ki me’d mo tani aris ’kwani ’baar mo nyaḵki so ki uni kun ’kona lambalany jin yuḵu ki ji ma Sulemaan mo mmomer kagahara mo.

¹²Dhali ka Buṯerus ki p̱ar a’di e mo tani a’di ki thoḵ ’kwani gwo mo ki: ’Kwani ma Israyiil, ata mera um gom wathi/ yan kan mo? walla ata hila um am ka ’thime/ kan mo me’d mom’bi’th jin ta jim bam ki is bam mo dhali mmodhuna aman is bam ki she/ ki dhelel dhelel mo tani am wac̱a a’di mmomish ya ki shoka?

¹³Arumgimis ma Ibrahiim dhala Is/hak dhala Yakuub, Arumgimis gi ibabam bana, karki ca gi c̱iŋkinam piti ka Yesus eya tente/ jin c̱ikina um mmowu mo dhali jin waṯkina um gway mo ibwambor ma Bilaaṯus mo ki a’di dina gwo ibwa mo mmo’cuḵ a’di mo be.

¹⁴Hili um waṯki gway ma Amanḵogu yan dhali Amanmii ka ḵar/eŋ gana/ yan mo dhali um doṯkina man’kosha mee mo jin minu c̱iki um mo be.