Menge Ininang 3:4-14

⁴Pegkità dan kandin, minikagi si Pedro, “Tengtengi kay.”

⁵Yan timengteng se kapig kandan, so eden din aw doen kwarta ibegay kandin.

⁶Meneng minikagi si Pedro, “Wedad palos kwarta ko, meneng tebangan ta te mebatog ko. Pineokit te ngadan i Jesu Cristo tege Nasarit, ipanaw ka.”

⁷Penga niyan, inewidan i Pedro se belad din digsel te kowanan aw impetindeg din. Pegketà migkagsen se benis din.

⁸Yan timindeg sikandin aw migpanaw-panaw. Penga niyan, minawop sikandin doton didalem te simbahan doma ki Pedro aw si Juan. Migpanaw-panaw sikandin, aw migtolayun, aw induyun din se Timanem.

⁹Kinità te kedita te otaw kidoen se peg-ipanaw din aw pegduyun din te Timanem.

¹⁰Kinilala dan sikandin se otaw tapay metipemoyò gayed egpenenoo doton te lelebangan iningedanan Pelasan. Yan ontò dan nepela kandin so kinità dan negolian den.

¹¹Kidoen si Pedro aw si Juan te sebad balkon te dakel simbahan iningedanan Balkon i Solomon. Inewidan dan te otaw negolian tandà te luba din. Netipon se kedita te otaw kidoen kandan so nepela dan.

¹²Pegkità i Pedro te otaw netipon, minikagi, “Menge kedomaan ko Judiyo, ikà niyo egkepela kenyan. Ikà niyo egtengteng kenami. Kenà kenami tolos se nekegolì te otaw kapig. Kenà heman lekat te ketòlid day.

¹³Timanem se egseligan te kemonaan tadon si Abraham, si Isaac, aw si Jacob. Timanem se migpegolì kandin amon iduyun se Batà te Timanem si Jesus. Kedengan insogò din si Jesus dini te tanà, meneng sikiyo se otaw nemegay kandin diyà te belad te gobirno. Pengkey ibeg i Pilato ipelowà din si Jesus, meneng simagda kaw kandin amon imetayan se insogò te Timanem.

¹⁴Pengkey wedad palos salà din, meneng wedà kaw keibeg kandin. Nemoyò kaw te ipelowà i Pilato se otaw metibonò.