Godigo Sęba Tagala Palai Bidigo Po 3:4-14

⁴Augwali sigo te bidi dolo tonalu, tama Pitago te po wai, “Da siba nago tonaluao,” wali.

⁵Tama te po obaso, te bidigo augwali si tonaluali, agai homugo ‘Augwali sigo masigi enabolo mawaibao.’

⁶Pitago agabolo te po wai, “Ena masigi menio. Tialima, eno elalubo nai deli nagebolo mawaibao. Jisas Krais, te Nasaret bidi, agai te bomo elalubaso, eno nagebolo obao, nage bilao.”

⁷Tama olama, sągą dwai bidigo dolo nogogo Pita nogo tolasa hodaluali. Tama megi tama sągą si dali si ma dolo yali, te aga sągą gąų si me ma dolo yali, tama tigidali sągą dili ma bomo yai.

⁸Tama agai sągągo sasa mano biliyu, posoga palu, posoga palu elama, aga sągągo dolo dolaluali, tama agai bilalio. Aga augwali si dali Moni Lotu Be tempel tomoba pobadi yaide, agai posoga palu elama biliyu, agai Godigo nogi ugwaba salio.

⁹Tama tigidali we bidi te Moni Lotu Be tempel tomode augwaligo te bidi bilibo suali, agai tama biliyu Godigo nogi ugwaba sali.

¹⁰Augwaligo te bidi sulama, koneai, te po wai, “Te bidigo e Moni Lotu Be tempel sunumide dugulalu tigidali bidi hanalu wai, ‘Masigi enanu mao,’ wabo da, te sunumi nogi Dwagi Yai Mu,” te po wai. Te mone enanu mao gonudali bidi aga sągą usu elama bilibaso sulama, augwaligo noma mu sai.

¹¹Te bidi agai Pita dali Jon dali tagalabo homu meni, tama te bidi si nogogo toalio. Tama bidi sela Moni Lotu Be tempel tomode dolalubo, te be mabode, te mabo nogi Solomongo Be Mabo. Tigidali we bidi augwali noma selama, udulama, te bidi sela pageba sabolali.

¹²Tama Pitago te we bidi sulama, augwalibolo te po wai, “Israel dabe, magi baso dage noma sobawe? Magi baso dagego da gedugo bugagia osabawe? Dadi sigo bomogo e bidi bilimai hagede dodolobeo, te menio. Dadi si dwagi yai bidi menio, e bidi dodolobeo. Godigo e sę yali.

¹³Dena wąį mu Abraham dede, Aisak dede, Jekop dede polobadu augwaligo koneama, Godibolo lotu po wabo page wai. Tama te Godigo agai ogwa Jisasgo nogi da ola mawai dao, te aga bomo me. Aga da, te da tau sabo bidi dao. Tiali goli, dagego polobadu Jisas te gavman genuai bidi teba odasa pai. Dagego aga po tų elama, te kiap bidi nogi Pailat agai Jisas olo tagalai homu yai.

¹⁴Tiali goli, dagego te bidi Jisas tudiba muani, dwagi yai kolesaga yai bidi, mu doloba pai bidi dao. Dagego te kiap Pailat hanaluyu, ‘Te bidi Barabas olo tagalama, da mao,’ te po wai.