Acts 23:7-28

⁷Maranai wei i latoni Pharisi ma Sadusi viparipariniḡai i raukarei ma boru i kai da ruaḡa.

⁸Aubaina Sadusi e ririwa da rava e irairaḡe lamna eḡa ita vovomairi me, ma anela da aruarua eḡa ita vivitumaḡanei, wate Pharisi wei anatapui e vivitumaḡanei.

⁹Ḡaiawa ḡaeḡaena i tupua ma tarawatu babadai ḡelaui taui Pharisi, i vomairi ma i babani guratana i pa, “Tauai eḡa aiwai apoapoena ata inanai wei ravana awarina! Mepa da anela bo Bada Aruana tauna awarina i babani?”

¹⁰Viḡaiḡaiawa ḡaeḡaena i tupua ma sorodia ai bada i rovo mepa da rava Paul ina viaisikasikai ma sorodia i egari da i rui ma Paul i taravaina-opunei ma ina naieiau bareki.

¹¹Ma waguvarai ḡelauna, Bada Paul au ririvana i mairi ma i riwei, “Tepam ina tora! Me aubaiu u jima au Jerusalem nanare aubaiu au Rome ma jima.”

¹²Ubaubanai mai Jew ḡelaui i vitagogiei ma i viogatara ma i parivainuaḡana da eḡa ina am bo ina uma da Paul ina viraḡeni.

¹³Nelara 40 nanare i vianina da Paul ina viraḡeni.

¹⁴Taui i nae pirisi babadai ma dogadogara awarii ma i riwei, “Tauai parivainuaḡana bagibagina a kauei da eḡa ana am da Paul ana viraḡeni.”

¹⁵Taumi Boru ḡeḡetelarana maiteni ona moru ma riwa ona pari-tawanei sorodia badana awarina da Paul ina neiai ma ona vitara-virevirei da riwa kaua ona vaia. Tauai ana vipaipai da ana viraḡeni muriai da weka ina ḡetai.

¹⁶Wate maranai Paul avuna wei ogatarana i nonori ma i nae sorodia ai au bareki ma Paul i pariverei.

¹⁷Ma Paul sorodia badana i ḡoreiai ma i riwei, “Wei laragana laḡilaḡina ma naiei ami bada awarina da ana riwa ina riwei.”

¹⁸Ma i naiei ai bada ḡaeḡaena awarina ma i riwei, “Panipani wavana Paul riwa i paritawanei awariu ma i riweu da wei laragana ata neiai awarim aubaina am riwa awarina.”

¹⁹Sorodia ai bada ḡaeḡaena laraga i vinimavoai ma i maeria ma i paridadanei, “Am riwa aiwai ma riweu?”

²⁰I riwa, “Mai Jew i riwa da ita vibaḡaim da au maratom Paul uta naiei ai au Boru ḡeḡetelarana, Wei anatapuna moru.

²¹Wate eḡa ma rautaniḡanei aubaina rava 40 nanare pota e paipaini da ina viraḡeni. Taui i vioga da eḡa ina am da Paul ina viraḡeni. Taui i vokaukaua ma am vianina ava e paipaini.”

²²Ma bada laraga i riwei da eḡa aiai ina riwei ma i paritawanei.

²³Anina ma sorodia ai bada ḡaeḡaena babada ruaḡa i ḡoreiai ma i riwei, i pa, “Sorodia sod ravai 200, aiera ravai 200 ma hos ravai 70 ma vaia ma ona vokaukaua da waguvarai 9 oklok ona vomairi.

²⁴Hos biaḡa ona vaia Paul aubaina da aiaina ona naiei gavena Felix awarina au Caesarea.”

²⁵Ma sorodia ai bada pepa wenanare i girumi:

²⁶Tau Claudius Lisias, a girugiruma awarim au bada vinualaulaunam, Gavena Felix. Egualau.

²⁷Mai Jew wei orotona i vojijini ma ita viraḡeni, wate maranai a nonori da tauna Rome-ei ma lamna aubaina au sorodia maiteni a opu da au urai a vaitawanei.

²⁸A ḡoei da ata aramanei ana apoapoe aiwai, da ata naiei ai Boru ḡeḡetelerana awarina.