تَرُشُي 23:7-28

⁷عَ تٌ نَ قَلَ، بٌورٍ مَتَندِ نَشَ لُ قَرِ سّنِيٍ نُن سَدُ سٍنِيٍ تَفِ. حَمَ نَشَ عِتَشُن.

⁸سَدُ سٍنِيٍ تَن بّ، مِشِ مُ كٍلِمَ قَشّ مَ. عٍ مَن مُ لَشِ مَلٍكّيٍ نُن حِننّيٍ شَ قٍ رَ. كْنْ قَرِ سّنِيٍ تَن لَ نٍيٍ بِرِن شَ قٍ رَ.

⁹سْنشْي شُنفبٍ نَشَ مِنِ. سّرِيّ كَرَ مْشْ ندٍيٍ قَرِ سّنِيٍ تَفِ عٍ نَشَ وْيّن شْرْشْي قَلَ. عٍ نَشّ، «مُشُ مُ قٍقٍ حَاشِ يٌ رَكْرْ سِشِ يِ شّمّ مَ. تّمُندٍ حِننّ ندٍ، شَ نَ مُ عَ رَ مَلٍكّ ندٍ، نَن وْيّنشِ عَ رَ.»

¹⁰سْنشْي تٌ نُ سِفَمَ فبٌ رَ، سْورِ مَنفّ نَشَ فَاشُ عٍ قَ ثْلُ قَشَقٍ. عَ نَشَ سْورِيٍ رَفٌرٌ عٍ شَ ثْلُ تٌنفٌ عٍ تَفِ، عٍ شَ عَ شَنِن سْورِ بَنشِ كُي.

¹¹نَ كْي رَ، مَرِفِ نَشَ مِنِ ثْلُ مَ. عَ نَشَ عَ قَلَ عَ بّ، «عِ شَ لِمَنِيَ بَرِ مَ عِ قِندِ مَ ﭑ مَ سٍيدٍ نَن نَ رْ مَ عَلْ عِ عَ رَبَشِ دَرِ سَلَمُ كِ نَشّ.»

¹²كُيٍ تٌ عِبَ، يُوِقِيٍ نَشَ لَنيِ شِرِ كَلِ رَ، عٍ نَشَ عٍ دّفٍ، عٍ نَشَ عٍ مِن سِندٍن، عَ قٌ عٍ شَ ثْلُ قَشَ.

¹³نَشٍيٍ نَ لَنيِ شِرِ، عٍ نُ دَنفِ مِشِ تٌنفٌ نَانِ رَ.

¹⁴عٍ نَشَ عَ مَسٍن سّرّشّدُبّ كُنتِفِيٍ نُن قٌرِيٍ بّ، «مُشُ بَرَ مُشُ كَلِ عَلَ رَ، مُشُ مُ سٍسٍ دٌنمَ سِندٍن قٌ مُشُ شَ ثْلُ قَشَ.

¹⁵عَوَ، يَكْسِ، وٌ تَن نُن يُوِقِ كِيتِسَيٍ شَ مَنفّ مَيَندِ عَ شَ قَ عَ رَ عَلَكٌ وٌ شَ عَ شَ قٍ مَتٌ عَ قَنيِ رَ. نَ كُي، مُشُ تَن عَ قَشَمَ كِرَ رَ.»

¹⁶ثْلُ مَافِنّ شَ دِ نَشَ نَ يَنقّ كٌلٌن. عَ نَشَ سِفَ سْورِ بَنشِ كُي، عَ نَشَ نَ بِرِن مَسٍن ثْلُ بّ.

¹⁷ثْلُ نَشَ سْورِ مِشِ كّمّ شُنمَتِ ندٍ شِلِ، عَ نَشّ، «يِ سّفّتَلَ شَنِن سْورِ مَنفّ شْن مَ، عَلَكٌ عَ شَ قٍ ندٍ قَلَ عَ بّ.»

¹⁸سْورِ كّمّ شُنمَتِ نَشَ سّفّتَلَ تٌنفٌ، عَ نَشَ عَ شَنِن سْورِ مَنفّ شْن مَ. عَ نَشّ، «ثْلُ، فٍيلِمَنِ نَن ﭑ شِلِشِ، عَ نَشَ ﭑ مَيَندِ عَ ﭑ شَ قَ يِ سّفّتَلَ رَ عِ شْن مَ، عَ شَ قٍ ندٍ مَسٍن عِ بّ.»

¹⁹سْورِ مَنفّ نَشَ سّفّتَلَ تٌنفٌ، عٍ نَشَ عٍ مَمِنِ. مَنفّ نَشّ، «عِ وَ مَ مُنسٍ قَلَقٍ ﭑ بّ؟»

²⁰عَ نَشَ عَ يَابِ، «يُوِقِيٍ بَرَ لَن عَ مَ، عٍ شَ عِ مَشَندِ عِ شَ ثْلُ شَنِن يُوِقِ كِيتِسَيٍ يِرٍ، عَلَكٌ عٍ مَن شَ مَشْرِنيِ ندٍ تِ عَ مَ.

²¹عِ نَشَ عِ تُلِ مَتِ عٍ رَ، بَرِ مَ مِشِ تٌنفٌ نَانِ نُن ندٍ بَرَ يَنقّ شِرِ عَ شُن عٍ يَ مَ. عٍ بَرَ عٍ كَلِ عَ عٍ مُ سٍسٍ دٌنمَ، عٍ مُ سٍسٍ مِنمَ عَ قٌ عٍ نَ ثْلُ قَشَ تّمُي نَشّ. يَكْسِ عٍ بَرَ فّ عٍ يَءِلَندٍ، عٍ قَ عِ سَفٌ نَن مَمّقٍ.»

²²سْورِ مَنفّ نَشَ سّفّتَلَ رَبٌلٌ، عَ نَشَ تْنيِ دْشْ عَ مَ، قَ قَلَ، عَ قٍ نَشَن قَلَشِ عَ بّ، عَ نَشَ نَ قَلَ مِشِ يٌ بّ.

²³عَ نَشَ سْورِ مِشِ كّمّ شُنمَتِ قِرِن شِلِ، عَ نَشَ عَ قَلَ عٍ بّ، «وٌ سْورِ كّمّ قِرِن يَءِلَن، سْورِ سٌي رَفِيٍ تٌنفٌ سٌلٌقٍرٍ، نُن شَلِ وٌلِ كّمّ قِرِن. وٌ شَ عٍ يَءِلَن سِفَقٍ رَ سٍسَرٍ تٌ كْي رَ.

²⁴وٌ شَ سٌي ندٍ يَءِلَن ثْلُ بّ، عَلَكٌ عَ شَ مَنفّ قٍلِسِ لِ هّيرِ كُي.»

²⁵سْورِ مَنفّ نَشَ يِ قٍ سّبّ بَتَاشّ رَ.

²⁶«ﭑ تَن كِلْدِ لِسِيَ، عِ تَن مَنفّ قٍلِسِ مَقَنشِ، ﭑ بَرَ عِ شّيبُ.

²⁷يِ شّمّ يُوِقِيٍ نَن عَ سُشُشِ. عٍ نَشَ وَ عَ قَشَقٍ. ﭑ تٌ عَ كٌلٌن عَ رْ مَكَ نَ عَ رَ، ﭑ نُن سْورِيٍ نَشَ قَ، مُشُ نَشَ عَ بَ عٍ يِ.

²⁸ﭑ تٌ وَ عَ كٌلٌنقٍ عٍ عَ سُشُشِ نَشَن مَ، ﭑ نَشَ سِفَ عَ رَ عٍ شَ كِيتِسَيٍ يِرٍ.