Föför 23:7-28

⁷Lon ewe chök otun a apasatä ekei kapas, ekewe Farisi me Satusi ra popuetä le aninifengen o ewe mwich a kinikinfesen.

⁸(Pun ekewe Satusi ra apasa pwe esap wor manausefäl seni mäla, ra pwal apasa pwe esap wor chon läng me ngün. Nge ekewe Farisi ra lükü lon ir me ülüngat.)

⁹Iwe, ar kapas a leüömongola o ekoch seni ekewe Sensen Allük, ir seni lon ewe mwichen Farisi, ra ütä o ra pöchökül le anini, “Äm aisap tongeni küna och mwälin ei mwän! Eli eman ngün ika eman chon läng a wesewesen kapas ngeni!”

¹⁰Iwe, ewe anini a chök fokun wattela, pwe ewe sounemenemen sounfiu a niuokus, ika ekewe aramas repwe atatakisi inisin Paulus. Iei mine a allük ngeni nöün kewe sounfiu pwe repwe feitiu lon ewe mwich, repwe angeawu Paulus seniir o aliwinala lon ewe lenien sounfiu.

¹¹Lon ewe pwinin, ewe Samol a ütä ren Paulus o a üreni, “Kosap niuokus! Ka pwäriei ikei lon Jerusalem, iei usun kopwe pwal fokun pwäriei lon Rom.”

¹²Lesosorun sorotän ewe rän ekoch chon Juta ra chufengen o föri eu raw. Ra atolongeer lon eu pwon mi fis fän akapel, pwe resap mongö ika ün och tori ar repwe niela Paulus.

¹³Mi wor lap seni faik mwän mi akotafengeni ei raw.

¹⁴Mürin ra feila ren ekewe souasor mi lap me ekewe souakom o ra üreniir, “Äm aia atolongakem lon eu pwon, pwe aisap mongö och tori äm aipwe niela Paulus.

¹⁵Iei mine ämi me ewe mwichen soupwüng oupwe tinala ämi kapasen tüngor ngeni ewe sounemenemen sounfiu pwe epwe emwenatiu Paulus remi. Oupwe tipin föri pwe oua mochen kütta tichikin pworausen an föför. Nge äm aipwe molotä pwe aipwe niela i me mwen an esap mwo tori ikei.”

¹⁶Nge nöün fefinen Paulus a rongorong usun ei raw. Iei mine a feila lon ewe lenien sounfiu o apworausa ngeni Paulus mine a fis.

¹⁷Mürin Paulus a körato eman me lein ekewe meilapen sounfiu o a üreni, “Kose mochen emwenala ei alüal ngeni ewe sounemenemen sounfiu. A wor och mine epwe asile ngeni.”

¹⁸Iwe, ewe meilapen sounfiu a angei ewe alüal o emwenala ren ewe sounemenem o üreni, “Ewe chon fötek Paulus a köriei o tüngor ngeniei pwe üpwe emwenato ei alüal reöm, pun a wor och mine epwe asile ngonuk.”

¹⁹Ewe sounemenem a kamwöch pöün ewe alüal, a emwenala ekis o aisini, “Met ka mochen asile ngeniei?”

²⁰Ewe alüal a üra, “Ekewe chon Juta ra tipeeufengen pwe repwe tüngor ngonuk lesor om kopwe emwenatiu Paulus lon ar we mwichen soupwüng, nge repwe tipin föri ei pwe ra mochen kütta tichikin pworausan.

²¹Nge üa tüngor ngonuk pwe kosap aüseling ngeniir, pun a wor lap seni faik mwän ra op o witiwit. Ra atolongeer lon eu pwon mi fis fän akapel, pwe resap mongö ika ün tori ra niela Paulus. Iei ra molotä pwe repwe föri ei o witiwiti om kopwe apwüngala ar tüngor.”

²²Iwe, ewe sounemenem a üreni, “Kosap üreni eman, pwe en ka apworausa ngeniei ei pworaus.” Mürin a tinala ewe alüal.

²³Mürin ewe sounemenemen sounfiu a körato ruoman nöün kewe meilapen sounfiu o üreniir, “Oupwe amolätä ruopükü sounfiu pwe repwe feila Seserea me fik chon wawa oris, pwal ruopükü chon uwou siles. Iwe, oupwe molotä ämi oupwe sü seni ikei kulok tiu lepwinei.

²⁴Oupwe pwal awora ekoch oris fän iten Paulus pwe epwe wawa o tümwünüöchü i lupwen oupwe uweela ren ewe kepina Feliks.”

²⁵Mürin ewe sounemenemen sounfiu a makkei echö toropwe. Iei masouan:

²⁶“Ngang Klautius Lisias üa kapong ngeni en ämäfen kepina Feliks:

²⁷Ekewe chon Juta ra turufi ei mwän o ra sotun niela. Iwe, üa rong pwe i eman chon Rom, iei mine üa fiti nei kewe sounfiu o amanaua.

²⁸Üa mochen silei met popun ar atipisi, iei mine üa emwenatiu lon ar we mwichen soupwüng.