Paisowa 23:7-28

⁷Libana te ya libaen yo fede Falesiya yo Sadusi sa faibayaho fuyoꞌidi be sa faitamo dailinidi.

⁸(Sadusi sa liba mate hige mwahuli fuyo yo hige anelu yo yaluyaluwa. In moho Falesiya mate ginaulidi te sa kawawananahaꞌedi.)

⁹Bobohalahala ya laꞌi ya laulau na laugagayo tau lau faꞌataena haisa, iti Falesiya peledi sa obiyo fahi, be sa liba adidili tiyen, Doga te, hige ena heyaya somo ai lobahi! Nuwana yaluyaluwa e anelu i libalibama lisina!

¹⁰Faibayaho ya laꞌi wananaha, yo fede Komanda ya ꞌwasabu be iyen, Ibe Paulo ti tabe motumutu. Yo fede ena tau hiyala ya duidi be sa lidi (yai), Paulo sa mupafahi nuwanuwadi yai, be sa lawen tau hiyala edi baleki.

¹¹Maihonana mate Guyau ya obiyo Paulo sadaina yai na iyen, Nuwam i adidili! Yelusalem yai ꞌwasagu haꞌa wa duwai, ai Loma hinaga haba doha wa ginauli.

¹²Bobonna Diusi haisa simosimo yai edi sa oiliba. Sa angwala mate ibege somo hesa ti an e ti nom ee–, Paulo sa wunui.

¹³Oiliba te ganahewana yai mate dodoga ouꞌoulidi 40 ya diꞌoi.

¹⁴Habahim sa lau tau antalasam edi babaꞌisa yo Diusi babadadi lisidi na tiyen, ꞌE angwala haꞌa mate ibege somo ai an ee–, Paulo ꞌe wunui.

¹⁵Aho te, Sanhedeli maꞌemiu emi anꞌeta bwalabwala au fatamali lawen Loma edi Komanda lisina be Paulo i fatamaliyama lisimiu na auwe, “ꞌE fanuha bena Paulo ꞌe fatiꞌo buibui be matana somo ꞌe sibai.” Haba ai edaꞌeda ꞌe nahai, be ꞌe unui.

¹⁶Paulo ena golowa edi oiliba heyaheyayana wasana ya atahiyen. Yo fede ya lau tau hiyala edi baleki yai be Paulo ya liba fanuwatagu.

¹⁷Habahim Paulo ya yoga lau hiyala tau lau kulukuluwenna hesa lisina iyen, Hewali te u lawen komanda lisina. Somo hesa bena ya faliba.

¹⁸Yo fede hiyala tau lau kulukuluwenna ya lawen Komanda lisina be ya faliba iyen, Tau lau deli, Paulo, ya yogaigu na ya anꞌetaigu bena hewali te E leyama lisim be nuwatuhu hesa haba em ya liba.

¹⁹Komanda, hewali ni ya foya hudoꞌiyen be ya fatiꞌoi iyen, Somo bena wa falibagu?

²⁰Alinana hewali ya bui iyen, Diusi babadadi nuwadi esega be sa anꞌetaim bena bobon Paulo wa lawen Sanhedeli lisidi, be au bwalabwala yai sa fatiꞌo buibui.

²¹In moho tabu alinadi u lau watanidi paꞌana tau nahaina ouꞌoulidi 40 ya diꞌo mate sa bagibagiyen. Haꞌa sa angwala mate ibege somo ti an o ti nom ee–, Paulo sa wunui. Haꞌa sa nonoha, na em yali moho sa bagibagiyen.

²²Habahim komanda, hewali ya liba fanuwatagu iyen, U koman! Tabu sai hesa u faliba mate edi bwala te, haꞌa wa fafinaheyama lisigu. Yo fede ya dui ya lau.

²³Habahim komanda ena hiyala tau lau kulukuluwendi luwaga ya yogaidima be fatalawaudi iyen, Tau hiyala 200, yo hosi tau awaidi 70, yo alahiya tau abidi 200, au nonohaidi. Haba 9 koloki ma afa haidamiu ami lau Sesaliya.

²⁴Hosi fisa au abi nonohaidi, be haba Paulo ma loholohona ami lawen Gawana Filiki lisina.

²⁵Na habahim Komanda leta ya uli doha ite:

²⁶Yau Kilaudiya Laisiya E uliꞌuliwa, Um ma hesam, Gawana Filiki! Yauwedo.

²⁷Doga te, Diusi sa tohai be egoba sa wunui. In moho tau hiyala ma afa haidagu ꞌe laoma be ꞌe galatata, paꞌana E sibai, in, Loma dogana.

²⁸Somo lisina yai sa fafagilu E fanuha bena E sibai. Logena E lawen Diusi edi Konisela Sanhedeli lisidi.