LOS HECHOS 23:7-28

⁷Are Pablo ndac̈ho yá, xifariseo co xisaduceo coexinhi xa joinchediscutí xa. Co cayoi grupoe xa ẍaxaon xa ojejé.

⁸Ixin xisaduceo vandac̈ho xa ixin tti nindadiguenhe irrocjanha rroxechon na co ixin ẍonhi ángel jí co ni ẍonhi espíritu jí. Co xifariseo vandac̈ho xa que ján jí cain mé.

⁹Cainxin xa coyao xa icha co icha. Cottimeja vingattjen canxion ximaestroe ley que vaguitticaon xa inchin xifariseo co ndac̈ho xa: ―Xí jihi ẍonhi cosa jianha joinchehe xa. Co puede ná espíritu jian o ná ángel de Dios onichja ngain xa, mexinxin ttjiho na cuidado que ixin rroningacoenha na Dios.

¹⁰Co anto joinchediscutí xa hasta tti vaquetonhe xisoldado ẍaon ixin puede nasoenxon xa Pablo. Mexinxin rroanha joajna ngain xisoldadoe ixin vantsjexin xa Pablo de nttiha co sajoicao xa Pablo tti vintte xa iná.

¹¹Co are ttie Jesús, tti chonda cain joachaxin, ẍago ngain Pablo co ndache: ―Ẍaonha Pablo, ixin jaha rronichja de ixin janha ngain ciudad de Roma inchin jaha onichja nttihi Jerusalén.

¹²Co nchanho yoxin canxion chojni judío cjoao chó na ixin narrogoenxon na Pablo. Co joinchejurá na ixin rrojineha na ni rroguiha na hasta narrogoenxon na Pablo. Co ndac̈ho na ixin Dios nchao rrojinchehe feo ngain na si nasoenxonha na Pablo.

¹³Co cain nicjoao chó mé icha que cuarenta xí.

¹⁴Co sacjoi na ngain xidána que vaquetonha ngain cain icha xidána co ngain xivaquetonha ngain nihngo judío co ndache na xa: ―Janha na jointtajurá na co ndattjan na Dios ixin nchao sinchehe feo nganji na si nasoenxonha na Pablo. Co jointtajurá na ixin sineha na ni siha na hasta soenja na Pablo.

¹⁵Mexinxin jaxon, soixin ra co icha chojni que chonda joachaxin ngain juzgadoe nihngo, ndache ra tti ttetonhe xisoldado ixin ndoe tsiaho Pablo nganji ra iná. Co ndache ra ixin rinao ra sanchianguihi ra icha. Pero Pablo tsiha ixin janha na rrochoan na ngatja nttiha para sonhe na.

¹⁶Co xancoén Pablo, xenhe nc̈hichó Pablo, conohe xan cain yá co sacjoi xan tti vintte xisoldado para ixin ndache xan Pablo cain yá.

¹⁷Cottimeja Pablo vayé ná xicapitán co ndache xa: ―Nttatsanha ñao, ttjiho xan jihi ngain tti ttetonhe xisoldado ixin chonda xan ná joajna para ixin jehe.

¹⁸Xicapitán mé joicao xa xan ngain tti vaquetonhe xisoldado co ndache xa: ―Pablo tti jiaxinhi vayahna para ixin joiquian xan jihi nganji ixin jehe xan chonda xan ná joajna para ixin soixin.

¹⁹Tti vaquetonhe xisoldado tse ná rá xan mé co joantsjenda xan nchion co joanchianguihi xan co ndac̈ho: ―¿Quehe rinao rrondachjenji na?

²⁰Cottimeja xan mé ndache xan: ―Canxion chojni judío ocjoao chó na ixin rrondattjo na soixin ixin ndoe tsjiho Pablo ngain juzgadoe nihngo. Jehe na rrondattjo na ixin rinao na sanchianguihi na Pablo icha.

²¹Pero soixin ditticaonha na ixin ngatja nttiha sema icha que cuarenta xí de ngain ladoe na rrochonhe xa Pablo ixin nasoenxon xa. Co ojoinchejurá xa ixin Dios nchao sinchehe feo ngain xa isi soenha xa Pablo co cai sineha xa ni siha xa hasta soenja xa Pablo. Co jaxon techonhe xa quehe rrondac̈ho soixin.

²²Cottimeja tti vaquetonhe xisoldado ndache xan ixin rrondacheha xan ni ná chojni tti ndache xan jehe. Cottimeja coanc̈hjanda xan sacjoi xan.

²³Cottimeja tti vaquetonhe xisoldado vayé yó xicapitén co ndache xa: ―Sico yó ciento xisoldado que tsjixin rotté co setenta xisoldado que sinttetaha conxin co yó ciento xisoldado que sicao lanzé. Co cainxin ra sattji ra ttie a las nueve ngain ciudad de Cesarea.

²⁴Co cai ttjiho ra canxion conxin para ixin Pablo setaha. Co dinttenda ra Pablo hasta saso ra ngain Félix xigobernador ixin ẍonhi tsonhe.

²⁵Co tti vaquetonhe xisoldado rroanha ná carta conixin xisoldado mé, co carta mé ndac̈ho carta:

²⁶“Janha Claudio Lisias chjaha joajna nganji soixin Félix xigobernador.

²⁷Chojni judío coiaxinhi xí jihi co joinao na narrogoenxon na xa. Pero are janha conona ixin jehe xa ná chojni romano, janha cjoi conixin xisoldadona co vantsjexin xa de ngá rá chojni judío.

²⁸Co janha cjoinha xa ngain juzgadoe ningoe chojni judío ixin joinaho conona quehe cosa jianha joinchehe xa.