Acts 23:7-28

⁷Nikona i sisiyei wai Sadducee biyisi ba Pharisee biyisi, bikawapata kamosi yai i tupuwa wai si buburana.

⁸(Sadducee biyisi te wonawona kata bomsiri mena kega, ba aneya kega ba kanuma yebo kega saba, Pharisee biyisi wai nikosi ereonowasi te bigeruwana.)

⁹Ba bikawapata i rakata saki kata kairuwana bibeyebeyena biyisi mutusi ba Pharisee biyisi si bomsiri ba si kaomainimaini, “Niko sebare ana goyona kega! Memena bage, kanuma kona aneya kurina i sisiya.”

¹⁰Asi bikawapata i rakata saki ba Paul sita kayo taina sikai wai, abiya badana i nagara wai i poraisi sita gakira Paul kamosi yai sita yauna taveyei asi ku yove.

¹¹Kona pomnai, Bada Paul i rerematara kurina ba i wona, “Kega kuna nagara ba ke msi kikita! Kom kairaviku nina Jerusalem yai kui mamatara wai yebo kesanina Rome kamonai kuna wosei.”

¹²Mara i tom mena wai Jew biyisi si notuwa ba si dugu ba si kaobaiyoyobana, Kata siti siya kega sita kam, kona sita toma yepo Paul sita kasibunui.

¹³Kata Sebasebare asi 40 rubana niko sisiya si popoi.

¹⁴Ba si nae priest kaikaiwabosi ba babadisi kurisi ba, si wona, “Yakai ka kaobaiyoyobana kata kega kesana awaika kana kanikani yepo, Paul kana kasibunui.

¹⁵Kai roritaina wai nikasike komi Sanhedrin yabata abiabiyisi asi bada koni babai kata, Paul ina yauni ina gakira kurimi bibuibuiyina kwarumei kairavina. Kata ami waina sisiya kabitam kona yauni. Ka bobunaga kata muri yai ita verakasibau nikei wai kana kasibunu.”

¹⁶Saba maranai Paul nobuna natuna sebare niko wara i nonori wai i nae abiabiyisi asi ku yove ba Paul i wonei.

¹⁷Paul abiabiyisi asi bada kesana i yorei ba i wonei, “Niko sebareikei ke urabai ke nae abiya badana kurina ba sisiya kesana ina wonei.”

¹⁸Damanina ba i urabai i nae abiya badana kurina, ba i wona, “Patupatumina Paul i yoriku ba i babaiku kata niko sebareikei ata botuwei kurim kairavina kona sisiya kesana ina wonim.”

¹⁹Abiya badana nimana i yauni ba ikesina i taina sirei ba i toirubai, “Awaika am waina kuna woniku?”

²⁰Sebareikei i wona, “Jew biyisi si damanina kata maram sini babaim Paul kuna urabai Sanhedrin naosi yai sina kwaruma ba sini buibuiyei.

²¹Saba kega kuna wosei, kairavina pipiya 40 rubana sina koba ba sina potapotai. Si kaobiyoyobana kata kega sina kam kona sina toma yepo Paul sina kasibunui. Karaku si bobunaga ba sini babaim wai am bidamanina sina potai.”

²²Abiya badana i wona, “Kega kesana kotoi kuna wonei kata ku botu ku woniku.” Ba i pora taveyei.

²³Damanina ba abiabiyisi asi bada ana babada ruwamo i yorisi ba i kaobiyoyobanisi, “Abiabiyisi asi 200, ba horse abiabiyisi 70 ba iyo biyisi 200 yabata ko bobunagisi kata kona nae ku Caesarea ba ko bobunaga kata karaku 9:00 pom ai kona nae.

²⁴Horse ko bobunagisi Paul kairavina kata yawayawasina kona naveyei Governor Felix kurina.”

²⁵Ba governor ana pepa nikasike i kirumi.

²⁶Yauku, Claudius Lysias, a kirukiruma kom pipiya kaikapom kurim, Governor Felix. Enosaire!

²⁷Niko sebare Paul Jew biyisi si botawani ba yoginaikei sita kasibunui saba au pipiya yabata kai yawasi kairavina a bopanani kata kona wai Rome sebare.

²⁸Au waina ata kuiri kata awaika kairavina si bikunumakei, wai a urabai a nae asi Sanhedrin kurisi.