1Iau Pol, aposel ke Karisito Iesu, na wolwol ke God Tom Fafaliu kirer, ke Karisito Iesu, ae kere kiis nene isi, ini unune.
2Ia sisiit usuf o Timoti, keng kalalik tekentu na unune. Famais, rokap na fofonoi ke siaroh usuf o sing God Tama kerer, ke Kumguui kirer Karisito Iesu.
3Igii ia ka farakrakai o sabin isi ok kiis tom aiwa na Efeses, arae ia fas ta o, aunbiing ia la tah una falifuh na Masedonia. On kiis tom aiwa isi ok tikale fanseh ae ri fausum fanu la ini fal e fafausum famfabal.
4Ke ok tikale ri isi gong ri muduung sau ini foron titiipapah foes, ma ini foron ususe na foron mat ken fanu, foron ususe arae, biil ti farfarop lo. I fatapiek fakep ini orek sau, ma biil i fakuum foim ke God. Foim ke God i kuum sau ini unune.
5Ia use rakrakai na orek igii, isi kerek famais faliu ini kerer. Famais ae i la tina balrer ae i fuuh ke tina rokap na wolwol, ke tekentu na unune.
6Isau le fal e fanu ri ka la koseng ta foron rokap na sinang igii, ke ri ka mi sau na foron orek foes.
7Ri ier isi fausum fanu ini foron nagogon ke God, isau le biil ri usum na sanih ae ri use u. Biil sabin ri usum na kamtinan orek ae, ri wol le imel e tasum kiri lo.
8Kere usum le i rokap e foron nagogon ke God, male tikas i foim rokap ini.
9Kere usum sabin le foron nagogon, biil i tapiek usuf foron tom tortores, biil. Foron nagogon i tapiek sau usuf fanu aragii: Foron tom lek nagogon, foron tabun wong, fanu ae biil ri lotu la una aisa God, foron tom tel sinang laulau, fanu ae biil ri mi la na wolwol ke God, fanu ae ri tel sinang la tina piklinbat, foron tom sisiimete, fanu ae ri siimete foron temri ke foron tinri la,
10foron tom tel sinangun puur, kaltu ae i fakekel fis tom ini nenge kaltu, fanu ae ri lose fanu la isi nenge kaltu keskes ik fiil pes ri, foron tom famfabal, foron tom falimlim foes, ke fal e sinang sabin. Foron sinang tikii igii i neng keskes na foron fafausum ae i tekentu.
11Fafausum ae i tekentu ifasih ini Rokap na Fafas. Ma i la tinbae sing God ae i fuun ini fafakalok. Ma Rokap na Fafas ae, i fafas ini memeh ke God. God i unune ufu tah usuf iau isi ian fafas ini.
12Ia fotrokap usuf Kumguui kirer, Karisito Iesu, ae i ta ta rakrakai usuf iau, wara le i unune lo iau, ke ka tim pes ta iau isi ian tel foim kia.
13Pakanini ia use falaulau Iesu la, ia ka falaulau foron tom unune ke ia ka ta fangungut usuf ri. Isau le famais ke God usuf iau i laumet kanaka, wara le biil ia usum na foron tier ae ia tel u, ke biil biitom ia unune.
14Famais tinbae sing Kumguui kirer usuf iau, i laumet kanaka, ma i la usuf iau turim turan sinangun unune ke turan sinangun famais. Fafen igii, i wara sau lo Karisito Iesu.
15Orek igii ian use u, i tekentu kanaka ma keren unune lo. Iesu i puh uga na piklinbat isi in faliu pes foron tom tel sinang laulau. Ma ia laulau kanaka lon fanu tikii.
16Ma i e wara, God ka finngas famais kia usuf iau, isi Karisito Iesu ik finngas rokap na sinang usuf iau, ae i laumet kanaka, aunbiing i faliu pes ta iau. Ma ia laulau kanaka lon foron tom tel sinang laulau tikii. Pesu, iau arae nenge rokap na tintof usuf fanseh ae rin unune lo Karisito Iesu ma rik kep liu fitliu.
17Keren sik asa King ae i liu fitliu, ae biil i met la, ma biil ri par u la, ma i keskes sau i God. Ususefages usuf i biil in to rop. Amen.
18Timoti, keng kalalik, rakrakai na orek ae ia ta u usuf o, i arae orek poropet ae ri use ta u ulo wo. On sotih rakrakai na foron orek kiri, isi ok fapaket rokap ini Rokap na Fafas.
19Sotih rakrakai na unune kiam, ke ok mi na sinang ae o usum le i rokap. Fale fanu biil ri mi lo arae, ke unune kiri ka laulau arae nenge mon ae panaf i pagal u ke ka dom.
20Ifasih sabin arae Imeneus ru e Aleksenda. Ia ka ta ufu ta ruh una lima Satan, isi ruk kep usum isi biil sabin run use falaulau God.
