1Afa sa ka elni haig haig mona afa oflanai elni mona sihiagba afa sa ka elim membenig fwainigba eba kana mo lagig ofenaiba li megim tigigbi asa esug lago afa ofenaiba ainim heugugbi asa gokonig.
2Afa atiaba God kam wasneig faigba asa ka Godna mo fla sihiaule el lofeg afa atiaba ka mungwali gawigim anwenafeg afa ka Godna mungwali meaganai onigigim anwenafeg afa atiaba kana olug onigig ihlafegba asa ka mugum esonafe sa hili ika afa ka nai yi elim membenig nihe gohug fwainigba eba ka esug feg.
3Afa sa ka kiafna mungwali gawig el gawig fwainig elim mimagegoniba afa sa ka kikeafna eligim fwahaiba sa kam suwina tuhlufi afa sa ka nai yi elim membenig nihe gohug fwainig eba enag gafugag sa ka eseg eba mas kam kweagfui.
4Afa el mingnagim membenig eba enaig eseg elim nengigim afa aflahlanam enaig esenag afa enaig el mas elim ambobugenai afa mas hefum fingi fei afa mas tonbusiagei.
5Afa el mingnagim membenig eba enaig eseg nigmagegim eba mas ehe ika gofsei. Afa ehe mas ikagna ninimui afa amtakwalig ehem esinig enam mas onigaufi.
6Afa membenag nihe eba mas amtakwaligim sifakalenag mo eba nufunam mom sifakalenag.
7Afa membenag nihe eba enaig eseg haig haig kinig sa enaig elim pugunafe eba ehe mas enam oksi. Afa enaig elbi eba wahkig Godim fwina anwenafenagim asa wahkig ningegohba asa wahkig ehem kinig mas pigaupi.
8Afa membenag nihe eba gwese wahkig gofife afa Godna mo fli sihiaule elni mo eba awaiefe afa haig haig mona lagwagig gafa eba awaiefe afa el sa kwania anwenafig afa ehengelni enag anwenag gafa awaiefe.
9Afa suialag anwenag sa big flig eba mingnagim mungu big lambig. Afa Godna mo fli sihiaule elni mo eba mingnagim mungu lambig.
10Afa maia mangwal netini sa puguiba asa mangwal mungu mungug sa big lambig eba gweyi awaiefe.
11Afa maia ka luwal lofug gofenaba kana mo lagig i afa onigig i afa kwefihiageg i eba luwal weti nihig. Afa maia ka saglag lofegba asa ka luwalna niheba fwahag.
12Afa glau big mangwalim sa nanguig eba ofenaiba mangwalna sungwagim bu nof la mas big numwehe nanguig mo. Afa autunai la big enam numwehe ambala nangufi. Afa glau ka mungu mungugim anwenafeg afa enanam maia mangwal netini puguiba asa kana anwenag gafa enanam netini pugufe asa ofenai mungwalofug God ati kam anwenafenag.
13Afa sambaga mungu nihe gwese wahkig gohug eba Godim olug onigig i afa nengeafu God suialag bigim esenig i afa membenag nihe i. Afa membenag nihe enam nihem mungwali gose lambugu.
